ក្រុម Spurs បានបង្ហាញទំនុកចិត្តខ្ពស់ថានឹងអាចចងជើងខ្សែប្រយុទ្ធ Harry Kane បាននារដូវកាលដោះដូរកីឡាករខាងមុខ បើទោះជាមានក្លឹបធំៗ ជាច្រើនចង់បានរូបគេក៏ដោយ។
កាលពីម្សិលមិញនេះមានដំណឹងថាក្លឹប Manchester City និង Liverpool កំពុងសម្លឹងមើល Kane របស់ក្រុម Spurs នេះជាខ្លាំង ព្រោះថារូបគេជាកីឡាករអង់គ្លេស មានប្រជាប្រិយភាពម្នាក់។ ដោយឡែកអ្នកវិភាគជាច្រើនក៏បានផ្ដល់យោបល់ថា Kane ក៏តែចាកចេញពី Spurs នៅពេលនេះដែរ ប្រសិនណាបើរូបគេចង់មានឱកាសបានលើកពានរង្វាន់ធំៗដូចកីឡាករល្បីៗដទៃទៀត។
ត្បិតតែយ៉ាងនេះក្ដី សម្រាប់ក្រុមលោក jose Mourinho វិញយល់ឃើញថារូបគេមានសមត្ថភាពគ្រប់គ្រាន់ក្នុងការឃាត់ខ្សែប្រយុទ្ធដែលមានតម្លៃផ្ដាច់កុងត្រាដល់ទៅ២០០លានផោននេះ។ ការមានទំនុកចិត្ត ក៏ព្រោះតែបច្ចុប្បន្នរូបគេសល់កុងត្រាដល់ទៅ៤ឆ្នាំទៀតឯណោះ ហើយជាមួយតម្លៃដល់ទៅ២០០លានផោននេះ ក្នុងគ្រាមានមេរោគ Covid-19 គឺក្រុមដទៃទៀត នឹងមិនមានលទ្ធភាពក្នុងការបញ្ចេញកញ្ចប់ប្រាក់ដល់ទៅច្រើនសន្ធឹកសន្ធាប់នេះទេ៕ប្រភព Dailymail