រំឭកសម្តីចាស់មួយឃ្លារបស់ Mario Balotelli ដែលធ្លាប់បាននិយាយកាលពីឆ្នាំ ២០១២ បាននឹងកំពុងធ្វើឲ្យអ្នកគាំទ្រវិស័យបាល់ទាត់ហាក់មានការស្រងាកចិត្តជាខ្លាំង ព្រោះសម្ដីនិងស្ថានភាពបច្ចុប្បន្នវាសឹងតែប្រហែលគ្នាទៅហើយ។
ខ្សែប្រយុទ្ធសញ្ជាតិអ៊ីតាលី ក៏ធ្លាប់រួមអាជីពនៅហង្សបាន ២ ឆ្នាំដែរនៅរដូវកាល ២០១៤-១៦ ប៉ុន្តែក្រឡេកទៅសម្តីរបស់គេធ្លាប់និយាយនាឆ្នាំ ២០១២ (ចន្លោះពេលលេងឲ្យ Man City) គឺធ្វើស៊ីផ្លូវចិត្តអ្នកគាំទ្រ Liverpool ជាខ្លាំង។
Balotelli ធ្លាប់និយាយកាលនោះថា៖ “នៅថ្ងៃដែល Liverpool អាចលើកពាន Premier League វាគឺជាថ្ងៃអវសានរបស់ពិភពលោកទាំងមូល”។
បើធៀបនឹងមកទល់បច្ចុប្បន្ន Liverpool គឺប៊ិះនឹងមានកម្រិតពិន្ទុលើកពានស្វ័យប្រវត្តិទៅហើយ ប៉ុន្តែដោយសារការរាតត្បាតនៃបញ្ហាសកលនៃវីរុស COVID-19 ដែលរយៈពេលជិត ៤ ខែបានឆ្លងដល់មនុស្សជាងកន្លះលាននាក់ និងផ្តាច់ជីវិតមនុស្សអស់ជាង ២៤ ០០០ នាក់។ តើពិតទេ COVID-19 ជាសញ្ញានៃភាពអវសានរបស់ពិភពលោកឈានចូលមកដល់?