ក្រុមបាល់ទាត់ជម្រើសជាតិអង់គ្លេស ត្រូវលេងទល់ក្រុមក្រូអាត នៅវគ្គពាក់កណ្ដាលផ្ដាច់ព្រ័ត្រ FIFA World Cup 2018 នាម៉ោង១រំលងអាធ្រាត្រនេះ ដើម្បីសម្រេចយក១ក្រុមឡើងវគ្គផ្ដាច់ព្រ័ត្រ។
អង់គ្លេស ត្រូវបានអ្នកវិភាគជាច្រើនគិតថានឹងយកឈ្នះលើក្រុមក្រូអាតបាន។ ខណៈ ដែលការយកឈ្នះនោះ ត្រូវតែរកវិធីសាស្ត្រកាត់ផ្ដាច់ចង្វាក់លេងរបស់ Luka Modric និង Rakitic ឱ្យបាន។ កីឡាករឆ្នើម២នាក់នេះ ជាពិសេស Modric តែម្ដង ជាអ្នកនាំលេងសំខាន់បំផុតក្នុងក្រុមជម្រើសជាតិក្រូអាត។ ខ្សែបម្រើនិងជាប្រធានក្រុមក្រូអាតនេះ ពិតជាសំខាន់ទាំងការលេងការពារនិងប្រយុទ្ធខាងលើ ប្រសិនបើអង់គ្លេស បើកឱកាសឱ្យរូបគេមានបាល់លេងច្រើន នោះឱកាសក្រូអាតឈ្នះក៏មានច្រើនទៅតាមហ្នឹងដែរ។
ខណៈដែលអង់គ្លេសភ្លាម ក៏មិនអាចធ្វើការវាយសម្រុកដោយមិនប្រុងប្រយ័ត្នទៅលើការការពារដែរ ត្បិតអីក្រូអាតមានចង្វាក់ប្រយុទ្ធល្អនៅខាងលើ។ ការសហការគ្នាជាក្រុមក៏រឹតតែល្អថែមទៀត ធ្វើឱ្យអង់គ្លេសអាចពិបាកក្នុងការស្វែងរកគ្រាប់បាល់ខ្លាំងណាស់។
លោក Gareth Southgate បាននិយាយចំពោះប្រកួតខាងលើនេះដែរថាក្រុមរបស់លោកនឹងលេងដោយប្រុងប្រយ័ត្នបំផុត។ វាជាប្រកួតសំខាន់សម្រាប់អង់គ្លេស ក្រុមទាំងមូលមិនអាចធ្វើឱ្យអ្នកគាំទ្ររាប់លាននាក់របស់អង់គ្លេស អស់សង្ឃឹមបានឡើយ៕ប្រភព៖ DailyMail