អ្នកចាត់ការក្លឹបស្ករគ្រាប់ Everton លោក Carlo Ancelotti ត្រូវបានទទួលកាតក្រហមកាលពីយប់មិញ ពីសំណាក់អាជ្ញាកណ្តាលលើទីលាន បន្ទាប់ពីមានការប៉ះទង្គិចពាក្យសម្តីគ្នាពាក់ព័ន្ធនឹងការកាត់សេចក្តីរបស់ VAR នៅគ្រាប់បាល់ចុងម៉ោងដែលម្ចាស់ផ្ទះបម្រុងនឹងឈ្នះហើយនោះ។
នៅចុងតង់ការស៊ុតបាល់របស់ Dominic Calvert-Lewin ប៊ិះតែនឹងជួយឲ្យ Everton យកឈ្នះ United ២-១ ប៉ុន្តែចុងក្រោយគ្រាប់បាល់មិនត្រូវបានអនុញ្ញាត ក្រោយអាជ្ញាកណ្តាលទៅបើកមើល VAR សារជាថ្មី។
ទន្ទឹមនោះលោក Ancelotti បានផ្ទុះការតវ៉ាជាខ្លាំង រហូតដល់ថ្នាក់អាជ្ញាកណ្តាល Chris Kavanaghលើកកាតក្រហមភ្លាមៗឲ្យអតីតគ្រូ Napoli ទាំងមិនញញើតដៃ។
ថ្លែងក្រោយសន្និសីទសារព័ត៌មាន បន្ទាប់ពីចប់ការប្រកួតលោក Ancelotti បាននិយាយន័យសុំទោសបែបនេះថា៖ “មិនមានការពន្យល់ពីអាជ្ញាកណ្តាលច្បាស់លាស់ទាល់តែសោះ ពេលនោះខ្ញុំសុំការបកស្រាយពីគាត់ បន្ទាប់ពីមានរឿងយល់ច្រឡំនៅលើទីលាន គាត់ក៏បានបណ្តេញខ្ញុំចេញ តែក្រោយមកខ្ញុំក៏បាននិយាយជាមួយគាត់ដោយត្រជាក់ចិត្តបំផុត”។
លោកបន្ថែម៖ “ជាការពិតខ្ញុំមិនបានគោរពដល់គាត់ តែខ្ញុំអាចយល់បានព្រោះពេលនោះវារងសម្ពាធនៃការប្រកួតខ្លាំងពេក”៕ ប្រភព៖ BBC