បើតាមការចុះផ្សាយអត្ថបទបែបវិភាគរបស់សារព័ត៌មានអេស្ប៉ាញ Marca បានណែនាំឲ្យក្លឹប Real Madrid គួរតែចាប់អារម្មណ៍ក្នុងការតាមយក Erling Haaland ចេញពី Borussia Dortmund ជាជាងការចាយលុយធំយក Kylian Mbappe។
តំបន់ប្រយុទ្ធរបស់ Madrid ដាំបាច់ត្រូវតែស្វែងរកអ្នកជំនួសជាក់លាក់ណាម្នាក់ ក្រោយពី Cristiano Ronaldo ចាកចេញទៅ ខណៈដែលការរកគ្រាប់បាល់សព្វថ្ងៃក៏មិនសូវនឹងធឹងច្បាស់លាស់ដូចមុនដែរ។
ប៉ុន្តែការចង់បាន Mbappe ដែលលោក Perez តែងតែវ៉ៃភ្នែករហូតនោះ គឺទំនងជាលំបាកបន្តិច ព្រោះ PSG ដែលសេសសល់កុងត្រាជាមួយយុវជនបារាំងដល់ឆ្នាំ ២០២១ ហាក់មិនបើកផ្លូវទាល់តែសោះ ហើយប្រសិនណាព្រមលក់ក៏តម្លៃខ្លួនរបស់គេហក់ឡើងខ្ពស់មិនចាញ់ Neymar ដែរ។
បង្វែរមកវិញប្រសិន Madrid ងាកមកមើល Haaland ដែលរដូវកាលនេះរូបគេឡើងកូដខ្លាំង តាំងពីនៅក្លឹបចាស់ Salzburg រហូតផ្លាស់មកដល់ Dortmund គឺធ្វើឲ្យមានការចាប់អារម្មណ៍ខ្លាំង ដោយនៅ UEFA Champions League រកបាន ១០ គ្រាប់ហើយត្រឹម ៧ ប្រកួត ជាមួយគ្រាប់បាល់សរុបចំនួន ៤០ នារដូវកាល ២០១៩/២០។
ប្រសិនបើក្លឹបម្ចាស់ដី Bernabeu ដាក់ចិត្តតាមយក Haaland បន្តិច នោះក៏មិនទាមទារការចំណាយច្រើន ពោលគឺតម្លៃផ្តាច់កុងត្រារបស់គេបច្ចុប្បន្នថ្លៃប្រហែល ៧៥ លានអឺរ៉ូខ្ពស់បំផុត ហើយបុរសវ័យ ១៩ ឆ្នាំក៏ទំនងជានឹងអាចសម្របខ្លួនទៅបានដូចការមកដល់របស់ Vinicius Junior ឬ Rodrygo Goes អ៊ីចឹងដែរ។
បែបនេះគ្រប់យ៉ាងស៊ីសងលើការសម្រេចចិត្តរបស់ Real ថាតើចង់រង់ចាំដល់ Mbappe ធ្លាក់ថ្លៃខ្លួននៅខ្ទង់ឆ្នាំ ២០២២ សិន ឬលៃលកងាកទៅមើល Haaland ក្នុងពេលដ៏ខ្លីខាងមុខ?