សរុបពីរជើង ៤-៣ ជាលទ្ធផលដែល Real Madrid បានទម្លាក់ Bayern Munich ទៅកាន់ប្រទេសអាល្លឺម៉ង់វិញ នេះដ្បិតជើងទីមួយគ្មានភាពចម្រូងចម្រាស តែបង្វែរមកជើងទីពីរនៅដីអេស្ប៉ាញវិញ អ្នកគាំទ្រមួយចំនួនហាក់មិនចង់ឲ្យចប់ការប្រកួតនោះទេ ព្រោះពួកគេមានការមិនអស់ចិត្តនឹងចំណាត់ការមួយចំនួន។
បញ្ជាក់ជាមុន នេះជាការចែករំលែកពីស្ថានភាពក្លឹបសងខាង ជារួមយើងមិនបានចូលខ្លួនមកវែកញែកថាខាងណាខុស ខាងណាត្រូវឡើយ ហើយចម្លើយអស់នោះ ទុកឲ្យបងប្អូនជាអ្នកបញ្ចេញមតិតាមការគួរទៅចុះ។ ចូលដល់សាច់រឿងរបស់យើង ភាពក្តៅគគុកបានកើតឡើងនៅពេលដែល Bayern នាំមុខមុនមួយគ្រាប់ ក្នុងនាទី ៦៨ ពីសំណាក់ការពារស្លាប Alphonso Davies ដល់ហើយភ្លាមៗរំលងជាងពីរនាទីបន្ទាប់ Nacho Fernandez មានឱកាសស៊ុតមួយជើងក្នុងប្រអប់ ជាការថែមបាល់រ៉ាពី Federico Valverde តែអាជ្ញាកណ្តាលបើកពិនិត្យ VAR និងមិនផ្តល់ឲ្យទេ ក្រោមហេតុផលចោទថា Nacho គេបានប៉ះទង្គិចផ្នែកកធ្ងន់ធ្ងរទៅលើ Joshua Kimmich ឲ្យដួលក្នុងប្រអប់។
ចូលនាទី ៨០ ជាង ខាងក្លឹបអាល្លឺម៉ង់ព្យាយាមខំទប់ ខំថយ មិនហ៊ានឡើងដាច់មាត់ តែចុងក្រោយឲ្យភ្លាត់ទាល់តែបាន ត្រង់នាទី ៨៨ អ្នកចាំទី Manuel Neuer បង្កកំហុសគប់បាល់មកខាងលើមិនបានល្អ នាំឲ្យ Madrid មានឱកាសដឹកបាល់វាយបកលឿនៗ ហើយបញ្ចប់ទីដោយសំណាក់កីឡាករ Joselu ដែលថែមបាល់ឡងពីការស៊ុតសល់របស់ Vinicius Jr។
អត់ចប់ប៉ុណ្ណឹងទេ កំឡុងការថែមម៉ោង ៩ នាទី ចូលនាទី ៩០+១ សកម្មភាពពេលនោះមើលមួយភ្លែត វាស្រដៀងទៅនឹងបាល់ Offside តែអាជ្ញាកណ្តាលមិនបានផ្លុំកញ្ចែផ្អាកការប្រកួតឡើយ ពោលបន្តឲ្យលេងធម្មតា រហូតឈានដល់ការបញ្ចប់គ្រាប់បាល់ទីពីររបស់ Joselu ម្តងទៀត។ ជាការបញ្ជាក់ ក៏មានការពិនិត្យ VAR តែបានសម្រេចផ្តល់ជូនគ្រាប់បាល់ទៅ Real ជាធម្មតា។
ភាពក្តៅគគុកចុងក្រោយគឺនាទី ៩០+១២ ដែលអាជ្ញាកណ្តាលធំបានសម្រេចចាប់ជាបាល់ Offside ភ្លាមៗ បន្ទាប់ការលើកទង់ពីអាជ្ញាកណ្តាលខ្សែបន្ទាត់ ជាហេតុនាំឲ្យគ្រាប់បាល់ឱកាសតាមស្មើស៊ុតពី Matthijs de Light មិនត្រូវបានផ្តល់ឲ្យ។ ចប់ការប្រកួតភ្លាម បុគ្គល ៤ រូបនៅ Bayern បានចេញមកនិយាយឥតញញើតមាត់ មានដូចជា៖
អ្នកចាត់ការលោក Thomas Tuchel រៀបរាប់៖ “ខ្ញុំអត់ដឹងពន្យល់យ៉ាងម៉េចទេ ដឹងត្រឹមការវាយបកយកឈ្នះរបស់ Real មានពាក់ព័ន្ធនឹងអាជ្ញាកណ្តាល បើតាមច្បាប់បាល់ទាត់ ពិតណាស់សាច់បាល់ពេលនោះត្រូវឲ្យលេងបន្ត កំហុសដំបូងគឺមកពីអាជ្ញាកណ្តាលខ្សែបន្ទាត់ ហើយទីពីរគឺអាជ្ញាកណ្តាលធំ វាជាការបំពា-នលើច្បាប់បាល់ទាត់យ៉ាងចំៗខ្លាំងណាស់ នេះខាងអាជ្ញាកណ្តាលខ្សែបន្ទាត់ចប់ការប្រកួតក៏បានមកសុំទោសយើងដែរ”។
រីឯនាយកចាត់ការរបស់ Bayern លោក Max Eberl ក៏សង្កត់ធ្ងន់មួយម៉ាត់យ៉ាងខ្លី ថាអាជ្ញាកណ្តាលធំ លោក Szymon Marciniak ពិតជាបានបង្កកំហុសធ្ងន់ណាស់ក្នុងការប្រកួតកន្លងទៅនេះ។ ងាកទៅ De Light ជាអ្នកបញ្ចប់ទីគ្រាប់ចុងក្រោយ ហើយគេមិនឲ្យផ្តល់ឲ្យ ក៏លើកឡើង៖ “វាជារឿងអាម៉ាស់បំផុត ត្រង់អាជ្ញាកណ្តាលខ្សែបន្ទាត់ក៏បានមកនិយាយពាក្យសុំទោសមកខ្ញុំ ហើយប្រាប់ថាគាត់បានបង្កកំហុសពិតមែន ខ្ញុំអត់ចង់ប្រើពាក្យថា Real Madrid តែងតែមានអាជ្ញាកណ្តាលចាំជួយនោះទេ តែអ្នកមើលចុះ ឲ្យតែពួកគេប៊ិះបរាជ័យ នៅដង្ហើមចុងក្រោយតែងមានអ្វីកើតឡើង ហ្នឹងហើយទើបពួកគេបានឈ្នះពាន Champions League ១៤ សម័យ”។
ងាកទៅ Thomas Muller ក៏ខឹងខ្លាំងណាស់ដែរ និងបានបោះពាក្យមកថា៖ “វាចម្លែកខ្លាំងណាស់ ត្រង់អាជ្ញាកណ្តាលគាត់អត់មើល VAR ទាល់តែសោះ រឿងនេះកើតឡើងញឹកញាប់នៅ Madrid ដូចកាល Cristiano Ronaldo ប៉ុន្មានឆ្នាំមុន ដែលគេរកបានគ្រាប់បាល់ទល់ពួកយើង”។
ក៏ស្រាប់តែ Carlo Ancelotti ខាង Real Madrid ឯណេះវិញ បានចេញឆ្លើយតបទៅរឿងនោះដែរ៖ “ខាង Bayern ពូកែត្អូញណាស់ ការមិនអស់ចិត្តរឿងយកបកគ្រាប់បាល់យកឈ្នះ អូខេ អត់អីទេ អ៊ីចឹងយើងសុំត្អូញទៅវិញដែរ រឿងអាជ្ញាកណ្តាលរំសាយចោលគ្រាប់បាល់ Nacho ព្រោះកន្លែងហ្នឹង Kimmich គេធ្វើពុតដួលទេ”៕
ប្រភព៖ បរទេស