ទន្ទឹមនឹងការមកដល់របស់ Bruno Fernandes គឺគេបានមើលឃើញរួចស្រេចបាត់ទៅហើយពីអនាគតមិនប្រាកដប្រជារបស់ Paul Pogba ដែលជឿថានឹងបញ្ចប់ត្រឹមរដូវក្តៅ ឆ្នាំ ២០២០ នេះឯង។ ទ្រនំ ២ ដែលកីឡាករបារាំងអាចនឹងផ្លាស់ទៅចូលរួមមាន R.Madrid និង Juventus។
យ៉ាងណាមិញបើតាមរបាយការណ៍ចុងក្រោយមួយឲ្យដឹងថា Man Utd ជាក្លឹបអាណាព្យាបាលព្រមទម្លាក់តម្លៃខ្លួនរបស់កីឡាករ Pogba ហើយ ពោលគឺចុះ ៣០ លានផោននឹងតម្លៃដើមពីសព្វមួយដង ដែលថ្លៃដល់ ១៨០ លានផោន មកសល់ត្រឹម ១៥០ លានផោនវិញ។
តម្លៃនេះសោតនៅតែនាំផលចំណេញដល់ម្ចាស់ដី Old Trafford ដដែល ព្រោះកាលទិញយកពី Juventus គឺក្លឹបចាយអស់ ១០០ លានផោនតែប៉ុណ្ណោះ។
បច្ចុប្បន្នខ្សែបម្រើវ័យ ២៦ ឆ្នាំកំពុងមានរបួសញាំញីជាប់ខ្លួន ហើយក៏ជាឱកាសដ៏ល្អសម្រាប់ Fernandes ក្នុងការប្រជែងតំណែង ១១ នាក់ ប្រសិនសមត្ថភាពរបស់កីឡាករព័រទុយហ្គាល់មានពិតប្រាកដមែន៕ ប្រភព៖ AF