ខ្សែបម្រើ Paul Pogba បានបញ្ជាក់ប្រាប់មិត្តរួមក្រុមរបស់ខ្លួនថា ចង់ចាកចេញពីទឹកដី Old Trafford ទៀតហើយ ដើម្បីស្វែងរកក្លឹបថ្មីលេងវិញ។
កីឡាករសញ្ជាតិបារាំងនេះ មិនបានចូលលេងជួយក្រុមបិសាចក្រហម Manchester United តាំងពីខែធ្នូឆ្នាំ ២០១៩មកម្ល៉េះ ហើយរដូវកាលនេះរូបគេចាប់ផ្ដើមលេងបានតែ៦ប្រកួតប៉ុណ្ណោះ ក្រៅពីនោះសុទ្ធតែមានបញ្ហារបួសជាប់រហូត។ ក្រោយពីរបួសមិនឈប់នេះហើយ Pogba បានបង្ហើបប្រាប់មិត្តរួមក្រុមថារូបគេចង់ចាកចេញពី Man Utd នៅរដូវក្ដៅខាងមុខនេះហើយ ព្រោះលែងមានអារម្មណ៍លេងនៅអង់គ្លេសទៀត។
ខ្សែបម្រើវ័យ២៦ឆ្នាំនេះ មានក្លឹប២ចង់បានរូបគេខ្លាំង គឺ Real Madrid និង Juventus ។ លោក Zidane ដែលកំពុងដឹកនាំក្រុមអធិរាជស បានបង្ហាញចំណាប់អារម្មណ៍ចង់បាន Pogba តាំងពីរដូវក្ដៅកន្លងទៅម្ល៉េះ ប៉ុន្តែមិនអាចយកបានព្រោះក្លឹប Man Utd ដាក់តម្លៃខ្លួនរបស់គេខ្ពស់ពេក ដល់១៥០លានផោនឯណោះ៕ប្រភព៖ Dailymail
