ខ្សែការពារ Samuel Umtiti បានច្រានចោលសំណើរបស់ក្រុម Arsenal ដែលចង់បានរូបគេទៅលេងឱ្យនាខែមករានេះ ព្រោះចង់បន្ដលេងនៅក្រុម Barcelona ទៀត។
កាំភ្លើងធំត្រូវការខ្សែការពារខ្លាំងមែនទែន ដោយពួកគេបានព្យាយាមតាមទិញកីឡាករជាច្រើន ដើម្បីមកការពារសំណាញ់ទី។ តែគួរឱ្យស្ដាយ កីឡាករភាគច្រើនបានច្រានចោលសំណើរបស់ក្លឹបនេះ។ ជាក់ស្ដែង Umtiti របស់ក្រុម Barcelona ក៏មិនព្រមមកលេងនៅអង់គ្លេសដែរ រូបគេចង់បន្ដលេងឱ្យក្រុមអ្នកមានបុណ្យទៀត បើទោះជាមិនអាចធានាកៅអីជម្រើស១១ដំបូងរហូតក៏ដោយ។
លោក Setien ហាក់មិនសូវទុកចិត្តលើ Umtiti ឡើយ ដោយលោកជ្រើសយក Lenglet និង Pique ជំនួសវិញសម្រាប់ការលេងរបស់ក្រុម Barcelona ។ តែទោះជាយ៉ាងនេះក្ដី កីឡាករវ័យ២៦ឆ្នាំខាងលើមិនចោលក្ដីស្រមៃខ្លួនឡើយ ពោលគឺនឹងប្រឹងប្រែងហ្វឹកហាត់បន្ថែម ដើម្បីប្រជែងយកកៅអីជម្រើស១១នាក់មកវិញ៕ប្រភព៖ Dailymail