ការប្រកួតបើកឆាកឆ្នាំ២០២០នេះ ខ្សែប្រយុទ្ធ Cristiano Ronaldo រកបាន៣គ្រាប់ម្នាក់ឯង ជួយក្រុម Juventus យកឈ្នះលើក្រុម Cagliari ក្នុងលទ្ធផល ៤-០។
ក្នុងការប្រកួតបើកឆាកនេះ Ronaldo មានទម្រង់លេងល្អមែនទែន ដោយរកបាន៣គ្រាប់ហើយ និងបញ្ជូនបាល់ឱ្យមិត្តរួមក្រុមស៊ុតបាន១គ្រាប់ថែមទៀត។ នេះជាការរកបាន Hat-trick ទី៥៦ទៅហើយសម្រាប់ខ្សែប្រយុទ្ធព័រទុយហ្គាល់ខាងលើនេះ ហើយលទ្ធផលឈ្នះយប់មិញក៏ធ្វើឱ្យក្រុមសេះបង្កង់មានពិន្ទុស្មើក្រុម Inter Milan ប្រជែងតំបន់កំពូលតារាងដែរ។
Ronaldo បានបញ្ជាក់ពីអារម្មណ៍នៅពេលរកបាន៣គ្រាប់ដើមឆ្នាំនេះដែរថា៖ “ពិតជាមានអារម្មណ៍អស្ចារ្យខ្លាំងណាស់ ដែលរកបាន៣គ្រាប់ក្នុងឆ្នាំថ្មី និងជួយក្រុមទទួលបានជ័យជម្នះ”។ សម្រាប់ឆ្នាំ ២០២០នេះដែរ អតីតកីឡាករ Real Madrid រូបនេះ លេងម៉ូដសក់ប្លែក ដែលទទួលបានការចាប់អារម្មណ៍ច្រើនផងដែរ៕ប្រភព៖ DailyMaill