បែលហ្សិកបានឡើងទៅវគ្កបន្ដហើយ ក្រោយពីយកឈ្នះលើក្រុមជប៉ុន ៣-២ នាការប្រកួតកាលពីយប់មិញនេះនៅពានរង្វាន់ FIFA World Cup 2018 ។
យប់មិញនេះ ជាការប្រកួតស្វិតស្វាញបំផុតសម្រាប់ក្រុមទាំងពីរខាងលើនេះ។ ជប៉ុន រកបានគ្រាប់នាំមុខមុនដល់ទៅ២គ្រាប់ ប៉ុន្តែបែរជាត្រូវបែលហ្សិកតាមបានស្មើវិញ រហូតរកគ្រាប់បាល់ជ័យជម្នះបានថែមទៀតនៅចុងក្រោយ។ ១គ្រាប់ជ័យជម្នះនោះ ធ្វើបានដោយប្រើពេលត្រឹមតែ៩,៩៤វិនាទី ប៉ុណ្ណោះ។ នៅគ្រានោះ ជប៉ុនបានលើកបាល់ជ្រុងប៉ុន្តែត្រូវអ្នកចាំទី Thibaut Courtois ចាប់បាន។ ភ្លាមនោះ រូបគេបានបោះបាល់ទៅឱ្យ Kevin De Bruyne ដែលកំពុងឈរនៅកណ្ដាលទីលាន ដើម្បីធ្វើការវាយសម្រុកលឿនៗ។
Bruyne ក្រោយពីបានបាល់ហើយ ក៏ប្រើល្បឿនរបស់ខ្លួនរត់ និងបោះបាល់ផ្ដាច់កីឡាករជប៉ុនដល់ទៅ៤នាក់ឯណោះ ឱ្យដល់ជើងរបស់ Thomas Meunier ដែលនៅឈរម្នាក់ឯង។ Lukaku ក្រោយពីមិត្តរួមក្រុមបានបាល់ហើយ ក៏បានរត់ទៅមុខទីភ្លាម ដើម្បីរកកន្លែងទូលាយឱ្យមិត្តរួមក្រុមបោះឱ្យ។ ជាក់ស្ដែង រូបគេមិនបានស៊ុតខ្លួនឯងនោះទេ ដោយបានវាយកែងឱ្យមិត្តរួមក្រុមម្នាក់ទៀតគឺ Nacer Chadli ដែលមានជំហរស្រួលក្នុងការរកគ្រាប់បាល់។ ត្រឹមពេលមិនដល់១០វិនាទីនេះ បែលហ្សិកបានទម្លុះសំណាញ់ទីរបស់ជប៉ុន បាននិងយកជ័យជម្នះឡើងវគ្គ៨ក្រុមចុងក្រោយតែម្ដង៕ប្រភព៖ DailyMail
