លោក Pep Guardiola បានបើកផ្លូវឱ្យជំនួយការរបស់លោក Mikel Arteta ចាកចេញពីក្រុម Manchester City ដើម្បីទៅដឹកនាំក្រុម Arsenal ហើយ។
Mikel Arteta ជាអតីតកីឡាករ Arsenal ហើយបានចូលខ្លួនជាដៃស្ដាំរបស់លោក Pep ប៉ុន្មានឆ្នាំមកហើយ។ អតីតខ្សែបម្រើរូបនេះបានអភិវឌ្ឍខ្លួនយ៉ាងលឿនក្នុងអាជីពជាអ្នកដឹកនាំក្រុម រហូតទទួលបានទំនុកចិត្តខ្លាំងពីលោក Pep ។ ដោយសារតែបច្ចុប្បន្ននេះ Arsenal កំពុងលេងដោយគ្មានអ្នកចាត់ការក្រុម ហើយ Arteta ជាបេក្ខភាពល្អមួយរូបផងនោះ ទើបលោក Pep បញ្ជាក់ថាលោកនឹងឱ្យបុរសវ័យ៣៧ឆ្នាំនេះទៅ ប្រសិនបើក្រុមកាំភ្លើងធំពិតជាត្រូវការ។
Pep បានបញ្ជាក់បន្ថែមថា៖ “គាត់ជាចំណែកសំខាន់ សំខាន់ណាស់សម្រាប់ក្រុម Man City ។ ប្រសិនបើវាកើតឡើង វានឹងកើតឡើង ខ្ញុំមិនចង់និយាយអ្វីច្រើនទេ យើងមិនឃាត់គាត់ឡើយ។ ខ្ញុំមិនចង់ឃាត់នរណាម្នាក់ ដើម្បីធ្វើការទាំងដែលគេមិនសប្បាយចិត្តឡើយ។ Arteta នឹងក្លាយជាអ្នកចាត់ការល្អម្នាក់ទៅថ្ងៃអនាគត”៕ប្រភព៖ Dailymail
