ចាន់ រតនា បានដាក់គោលដៅចង់ប្រកួត៤លើកនៅសង្វៀន ONE Championship តាមតែអាចធ្វើទៅបាន ព្រោះថាឆ្នាំ ២០១៩ កន្លងទៅរូបគេប្រកួតបានតែ ២ លើកប៉ុណ្ណោះ។
ម្ចាស់ក្លិបសិល្បៈបានថ្លែងប្រាប់អ្នកសារព័ត៌មានរបស់យើងថា៖«អ្វីដែលខ្ញុំចង់បង្ហាញ គឺ ដាក់គោលដៅប្រកួតឲ្យបាន ៤ដងនៅឆ្នាំ ២០២០។ នេះជាការគិត របស់ខ្ញុំបើសិនមិនមានបញ្ហារាំងស្ទះនោះទេ”។
“ប៉ុន្តែបំណងទាំងនេះត្រូវរង់ចាំចម្លើយអំពីអ្នកចាត់ការរបស់ខ្ញុំ ឬ អ្នកផ្គូផ្គងរបស់ខ្ញុំដែរ»។
បន្ទាប់ពីរូបគេ ឈ្នះកីឡាករជើងខ្លាំងចំបាប់របស់គុយបា Gustavo Balart កាលពាក់កណ្ដាលខែ សីហា មក អ្នកលេងគុនចម្រុះតំណាងឲ្យកម្ពុជាខកខានឡើងសង្វៀនលំដាប់ពិភពលោកនេះរយៈពេលជាង ៤ ខែមកហើយ។ កូនប្រុសរបស់លោក ចាន់ ប៊ុនធឿន រំពឹងថា រូបគេអាចនឹងឡើងសង្វៀនដដែលនេះជាថ្មីនៅដើមឆ្នាំ ២០២០ ខាងមុខ។
បច្ចុប្បន្ននេះ រតនា បានដាក់ចិត្តដាក់កាយខំប្រឹងប្រែងហ្វឹកហាត់ខ្លាំងជាងមុន ដោយតែអាចប្រឈមនឹងគូប្រជែងខ្លាំងៗទៅថ្ងៃអនាគត និងអាចជាបេក្ខភាពមួយដណ្ដើមខ្សែក្រវាត់ទៀតផង។ គួរដឹងថា ចាន់ រតនា ប្រឡូកលើសង្វៀនគុនចម្រុះចំនួន ១០ លើកក្នុងនោះ ឈ្នះ ៧ ដង និង ចាញ់ ៣ ដងបន្ទាប់ពីកីឡាករជំនាញយុទ្ធគុនខមរូបនេះប្រឡូកលើសង្វៀនគុនចម្រុះតាំងឆ្នាំ២០១៥មក។
ក្នុងកំណត់ត្រាដ៏អស្ចារ្យមិនធ្លាប់មាន ម្ចាស់ក្លិប «សិល្បៈ» ឈ្នះ៣លើកជាប់គ្នានៅសង្វៀន ONE ដោយវាយកីឡាករឥណ្ឌូណេស៊ី ពីររូប Abro Fernandez និង Rudy Agustian ត្រឹមទឹកទី២ មុនពេលឈ្នះពិន្ទុ ជើងខ្លាំងជំនាញចំបាប់គុយបា Gustavo Balart នាពាក់កណ្ដាលខែ សីហា កន្លងទៅនៅកម្មវិធី ONE:DREAMS OF GOLD នៅប្រទេសថៃ។
ក្រៅពីមានបំណងងឡើងសង្វៀនលំដាប់ពិភពលោក ONE ឲ្យបានបួនដងកីឡាករវ័យ៣៣ឆ្នាំរូបនេះក៏មានគម្រោងពង្រឹងគុនភាពក្លិបរបស់ខ្លួនផងដែរ។
«ខ្ញុំផ្ដោតលើគុណភាពបន្ថែមទៀតដល់កូនសិស្សដើម្បីឲ្យពួកគាត់ពេញចិត្តសេវាកម្មរបស់ពួកខ្ញុំ។ ខ្ញុំគិតថាយុវវ័យឥឡូវយល់ដឹងអំពីសុខភាពច្រើន។ ហើយក្លិបរបស់ខ្ញុំក៏មិនធ្វើឲ្យបងប្អូនខកបំណងដែរបើសិនចង់មកទទួលការហ្វឹកហាត់គុនខ្មែរ។ បងប្អូនអាចយល់ដឹងអំពីគុនខ្មែរផងនិងទទួលបានសុខភាពផង។ ហើយបង្ហាត់ដោយគ្រូជំនាញៗចំនួន ៤នាក់»។