ក្លឹប FC Barcelona ថ្មីៗនេះបានផ្តល់កុងត្រាថ្មីមួយសម្រាប់យុវជនវ័យ ១៧ ឆ្នាំ Ansu Fati ជាមួយថេរវេលាដល់ខែមិថុនា ឆ្នាំ ២០២២។
ជាកុងត្រាបន្ថែមពីររដូវកាលថែមទៀត ជាមួយតម្លៃផ្តាច់កុងត្រា ១៧០ លានអឺរ៉ូ ដោយនេះត្រឹមជាតម្លៃនៃការលេងឲ្យឈុតតូច ហើយប្រសិនឈានដល់ការចូលរួមជាមួយឈុតធំជាសមាជិកពេញសិទ្ធ នោះតម្លៃខ្លួនរបស់គេនឹងឡើងដល់ ៤០០ លានអឺរ៉ូឯណោះ។
ការចុងកុងត្រានេះធ្វើឡើងកាលពីថ្ងៃអង្គារនៅទីស្នាក់កណ្តាលរបស់ក្លឹប FC Barcelona ក្រោមវត្តមានរបស់ប្រធានក្លឹបលោក Josep Maria Bartomeu និងប្រធានទទួលបន្ទុកផ្នែកយុវជនក្នុងក្លឹបលោក Silvio Elias ក៏ដូចជា CEO នៃក្លឹបលោក Oscar Grau ផងដែរ។
រំឭកថា Fati ដែលកើតនៅថ្ងៃទី ៣១ ខែ តុលា ឆ្នាំ ២០០២ បានមកចូលរួមជាមួយក្លឹបជាលើកដំបូងនៅឆ្នាំ ២០១២ ពោលគឺតាំងពីរូបគេមានវ័យ ១០ ឆ្នាំមកម្ល៉េះ។ យុវជនរូបនេះក៏ជាប់ឈ្មោះជាកីឡាករក្មេងបំផុតដែលបានចូលលេងនៅ Camp Nou និងនៅការប្រកួត Champions League កន្លងទៅ៕ ប្រភព៖ AF