Brendan Rodgers អ្នកចាត់ការក្រុម Leicester City បានបដិសេធ មិនទាន់ចង់ទៅដឹកនាំក្រុម Arsenal ឡើយ បើទោះជាមានសំណើផ្ដល់ប្រាក់តម្លៃពលកម្មច្រើនក៏ដោយ។
ក្រុម Arsenal ក្រោយពីដកលោក Emery ចេញទៅ មិនទាន់រកឃើញអ្នកចាត់ការថ្មីនៅឡើយទេ។ ពួកគេកំពុងទាក់ទងលោក Rodgers ទៅដឹកនាំក្រុម ដែលជាជម្រើសដំបូង ប៉ុន្តែក៏ត្រូវបានបដិសេធទៅហើយដែរ។ លោក Rodgers បានបញ្ជាក់ថាបច្ចុប្បន្ននេះកំពុងពេញចិត្តដឹកនាំក្រុម Leicester ដូច្នេះចង់បញ្ចប់ការងារនេះសិន ទើបមានចិត្តចង់ទៅដឹកនាំក្រុមដទៃទៀត។
អតីតអ្នកចាត់ការក្រុម Livepool ខាងលើបានបន្ថែមទៀតថា៖ “ខ្ញុំទើបមកដឹកនាំក្រុមនេះបានជាង៨ខែ ខ្ញុំមកទីនេះដោយមានមហិច្ឆតារបស់ខ្ញុំ។ ហើយវាជារឿងល្អណាស់ក្នុងការបានចូលដល់ Top6 ហើយខ្ញុំស្រលាញ់ពេញចិត្តគ្រប់នាទីដែលខ្ញុំបានមកដឹកនាំក្រុមនេះ។ អ្វីដែលខ្ញុំផ្ដោតគឺដឹកនាំក្រុមនេះឱ្យបានល្អ”។
រំលឹកថានារដូវកាលនេះ ក្រុម Leicester City ពិតជាធ្វើបានល្អណាស់ ដោយបច្ចុប្បន្នឈរនៅលេខ២ ក្នុងតារាង ចាញ់ពិន្ទុក្រុមលេខ១ Liverpool ៨ពិន្ទុ និងនាំមុខក្រុមលេខ៣ Man City ៣ពិន្ទុ៕ប្រភព៖ Dailymail
