Emre Can និង Mario Mandzukic ត្រូវបានលោក Sarri ដកឈ្មោះចេញពីបញ្ជីក្រុម Juventus ដើម្បីត្រៀមលេងពានរង្វាន់ UEFA Champions League សម្រាប់វគ្គសន្សំពិន្ទុតាមពូល។
ការមិនមានឈ្មោះលេងនេះដែរ បានធ្វើឱ្យសាមីខ្លួន Can ភ្ញាក់ផ្អើលជាខ្លាំង ត្បិតអីរូបគេក៏ជាកីឡាករសំខាន់មួយរូបក្នុងក្រុមផងដែរ។ និយាយអំឡុងពេលហ្វឹកហាត់ជាមួយជម្រើសជាតិអាល្លឺម៉ង់ ដើម្បីត្រៀមជម្រុះ Euro 2020 ខ្សែបម្រើរូបនេះ បានបញ្ជាក់ថា៖ “ម្សិលមិញ គ្រូបង្វឹកបានទូរសព្ទមកខ្ញុំ ហើយប្រាប់ខ្ញុំថានឹងមិនមានឈ្មោះក្នុងបញ្ជីលេង Champions League ឡើយ។ វាធ្វើឱ្យខ្ញុំភ្ញាក់ព្រឺតចំពោះដំណឹងនេះ ហើយក៏ខឹងជាខ្លាំងដែរ”។
អតីតកីឡាករ Liverpool ក៏បានបន្ថែមទៀតថាត្បិតតែយ៉ាងនេះក្ដី ប៉ុន្តែរូបគេនៅតែគោរពតាមការសម្រេចចិត្តរបស់គ្រូបង្វឹក និងបន្ដប្រឹងប្រែងហ្វឹកហាត់ផ្ទេរដង ដើម្បីបានទាក់ចិត្តគ្រូបង្វឹកវិញ។ ការមិនដាក់បញ្ចូលឈ្មោះរបស់គេនេះដែរ គឺមកពីក្រុម Juventus ទើបតែយកបាន Aaron Ramsey និង Adrien Rabiot មកបន្ថែមកម្លាំងនៅតំបន់បម្រើរបស់ខ្លួនទៀត៕ប្រភព៖ Dailymail