ក្រុមទុយណេស៊ី នឹងត្រូវលេងទល់ក្រុមខ្លាំងបែលហ្សិក នាម៉ោង៧ល្ងាចនេះ ក្នុងការប្រកួតទី២នាព្រឹត្តិការណ៍ FIFA World Cup 2018 របស់ខ្លួន។
កាលពីប្រកួតទី១កន្លងទៅ ពួកគេបានបរាជ័យក្រោមថ្វីជើងរបស់អង់គ្លេស ក្នុងលទ្ធផល ២-១ ម្ដងរួចមកហើយ។ ដូច្នេះប្រសិនបើចង់មានឱកាសឡើងវគ្គបន្ដបាន លុះត្រាយកឈ្នះលើក្រុមបែលហ្សិកនារាត្រីនេះ។ ការរំពឹងធំមួយនេះត្រូវបានលោក Nabil Maaloul គ្រូបង្វឹករបស់ទុយណេស៊ីនិយាយថា៖ “យើងត្រូវតែឈ្នះ យើងគ្មានជម្រើសទៀតទេ បើចង់ឡើងវគ្គបន្ដបាន។ បែលហ្សិកជាក្រុមខ្លាំងណាស់ នរណាក៏ដឹងដែរ ប៉ុន្តែយើងត្រៀមខ្លួនរួចរាល់ហើយ។ យើងជឿជាក់លើខ្លួនឯង ថានឹងអាចយកលទ្ធផលល្អក្នុងប្រកួតនេះបាន”។
ក្រុមបាល់ទាត់ជម្រើសជាតិទុយណេស៊ី ក្នុងព្រឹត្តិការណ៍ World Cup នេះ មិនទទួលបានជោគជ័យនោះទេ ពោលគឺពួកគេមិនធ្លាប់ឈ្នះម្ដងណាឡើយ បើគិតចាប់តាំងពីឆ្នាំ២០០២ មក។ ខណៈដែលការប្រកួតយប់នេះ ក៏អាចនឹងពិបាកសម្រាប់ក្រុមទុយណេស៊ីផងដែរ៕ប្រភព៖ DailyMail
