Neymar មិនអាចឡើងប្រាក់ឈ្នួល២,៧លានផោនបានឡើយ តាមកិច្ចសន្យា ព្រោះរូបគេមិនអាចមានឈ្មោះជាប់ក្នុងបញ្ជី១០នាក់ចុងក្រោយ FIFA’s The Best award ។
ខ្សែប្រយុទ្ធប្រេស៊ីលខាងលើផ្លាស់ទៅ Barcelona មកលេងនៅ PSG នេះ កាលពី២ឆ្នាំមុន ដោយរកបានប្រមាណជា៦សែនអឺរ៉ូក្នុង១សប្ដាហ៍។ ក្នុងលិខិតកុងត្រា ដែល PSG យកគេមក ឱ្យតែ Neymar មានឈ្មោះក្នុងបញ្ជី FIFA Best Players គឺនឹងបន្ថែមប្រាក់លើតម្លៃពលកម្មទៀត ដោយ១ឆ្នាំនឹងថែមឱ្យ២,៧លានផោន។ តែដោយសារឆ្នាំនេះ រូបគេធ្វើមិនបានល្អ មិនអាចជាប់ Top10 បាន ទើបរូបគេខកខានឱកាសឡើងទឹកលុយនេះទៅ។
យ៉ាងណាមិញ ខ្សែប្រយុទ្ធរូបនេះក៏កំពុងព្យាយាមចាកចេញពីក្រុមបារាំងនេះទៅហើយ ដូច្នេះចំនួនទឹកប្រាក់ខាងលើអាចមិនមែនជាបញ្ហាសម្រាប់គេឡើយ។ Neymar កំពុងធ្វើគ្រប់យ៉ាងដើម្បីបានផ្លាស់ទៅលេងនៅក្លឹប Barcelona វិញ នៅត្រឹមរដូវក្ដៅនេះ តែក្លឹប PSG វិញ ចង់ឱ្យគេបន្ដលេងឱ្យ១រដូវកាលទៀតសិន ទើបលក់ចេញ៕ប្រភព៖ Dailymail
