ខ្សែប្រយុទ្ធ Karim Benzema បានផ្ដាំទៅអ្នកគាំទ្រថាកុំគិតលើលទ្ធផលពេក ព្រោះប៉ុន្មានប្រកួតមកនេះគឺគ្រាន់តែជាប្រកួតមិត្តភាពកម្ដៅសាច់ដុំប៉ុណ្ណោះ។
Benzema រកបាន៣គ្រាប់ម្នាក់ឯង ក្នុងការប្រកួតដែល Real Madrid យកឈ្នះលើក្រុម Fenerbahce ៥-៣ ក្នុងការប្រកួតមិត្តភាពនៅទឹកដីអាល្លឺម៉ង់យប់មិញនេះ។ វាជាជ័យជម្នះមួយក្នុងចំណោមការប្រកួតមិត្តភាពកន្លងមករបស់ក្រុមអធិរាជស នារដូវកាលនេះ ហើយក៏បានធ្វើឱ្យអ្នកគាំទ្របន្ធូរបន្ទុកលើការដឹកនាំរបស់លោក Zidane ផងដែរ។
ក្រោយចប់ការប្រកួត កីឡាករបារាំងខាងលើបាននិយាយថា៖ “ឱ្យខ្ញុំប្រាប់អ្នកគ្រប់គ្នារឿងមួយ នេះគេហៅថាប្រកួតមិត្តភាពមុនបើករដូវកាលប៉ុណ្ណោះ។ ប្រកួតមិត្តភាពនេះ គឺដើម្បីរៀបចំក្រុមត្រៀមចូលលេងលីគ។ យើងធ្វើការច្រើនទៅលើការហ្វឹកហាត់កាយសម្បទា និងបច្ចេកទេសលើទីលាន។ ខ្ញុំដឹងមានការរិះគន់ច្រើន ក្រោយពីយើងរបូតដល់៧គ្រាប់ទល់ AT Madrid ប៉ុន្តែនោះជារឿងអតីតកាលប៉ុណ្ណោះ ខ្ញុំចង់ឱ្យអ្នកគាំទ្រផ្តោតលើលីគរដូវកាលថ្មីខាងមុខវិញ”៕ប្រភព៖ Marca
