អតីតអ្នកចាត់ការលោក Rafa Benitez បានសម្រេចលាឈប់ពីតំណែងកាលពីចុងខែមិថុនាកន្លងទៅ ក្រោយដឹកនាំក្លឹប Newcastle United អស់រយៈពេល ៣ ឆ្នាំ។
ជុំវិញមូលហេតុនៃការចាកចេញ លោក Benitez មិនបង្អង់យូរនោះឡើយ ដោយលោកបានសង្កត់ចំៗដល់ប្រធានគ្រប់គ្រងក្លឹបគឺលោក Mike Ashley ដែលថាមិនអាចធ្វើការរួមគ្នាតទៅទៀតបាន។ សារផ្ញើអ្នកគាំទ្រចែកចាយមុននេះបន្តិច អតីតអ្នកចាត់ការនៅហង្សរូបនេះបាននិយាយថា៖ “អរគុណសម្រាប់ពេល ៣ ឆ្នាំដ៏អស្ចារ្យ អ្វីដែលយើងមាននៅទីនេះគឺការស្រលាញ់និងការគាំទ្រ ដែលពិតជារឿងដ៏មិនគួរឲ្យជឿសម្រាប់ខ្ញុំ”។
លោកបន្តថា៖ “ខ្ញុំចង់បន្តនៅ ប៉ុន្តែខ្ញុំមិនយល់ព្រមលើការចុះហត្ថលេខាបន្តកុងត្រាថ្មី ដោយវាកាន់តែជាក់ច្បាស់នៅពេលដែលខ្ញុំពុំអាចចែករំលែកចក្ខុវិស័យរួមគ្នាជាមួយប្រធានក្លឹប [Mike Ashley] ដោយខ្ញុំពិតជាសោកសៅ តែក៏មិនសោកស្តាយដែលសម្រេចចិត្តមកដឹកនាំទីនេះ ហើយពិតជាមានមោទនភាពនៅអ្វីដែលយើងបានសម្រេចរួមគ្នាកន្លងមក”។ ប្រភព: 90min
