ការប្រកួតពានរង្វាន់ Copa America បានបើកឆាកប្រកួតហើយ ដោយក្នុងនោះក្រុមម្ចាស់ផ្ទះប្រេស៊ីល បានយកឈ្នះលើក្រុមបូលីវី ៣-០ យកបាន៣ពិន្ទុតែម្ដង។
ក្នុងនាមជាក្រុមម្ចាស់ផ្ទះ ប្រេស៊ីល ធ្វើបានល្អមែនទែន ដោយព្យាយាមវាយសម្រុកតាំងពីតង់ទី១មក ប៉ុន្តែរយៈពេល៤៥នាទីពេញមិនអាចរកគ្រាប់បាល់បានឡើយ។ ឈានចូលដល់តង់ទី២ បានបន្តិច ខ្សែបម្រើប្រយុទ្ធ Coutinho ក៏រកបាន១គ្រាប់ ដោយការទាត់បាល់ប៉េណាល់ទី១១ម៉ែត្រ។ ក្រោយពីនោះបានតែ៣នាទី កីឡាករដដែលនេះក៏ថែមបានគ្រាប់ទី២ឱ្យក្រុមប្រេស៊ីល មុនពេលកីឡាករ Everton ថែមបាន១គ្រាប់ទៀតនៅនាទី៨៣។ ចប់ការប្រកួត ប្រេស៊ីល ឈ្នះ ៣-០។
នេះជាការចាប់ផ្ដើមបានយ៉ាងល្អរបស់ប្រេស៊ីល បើទោះជាពួកគេមិនមានវត្តមានរបស់ខ្សែប្រយុទ្ធឆ្នើម Neymar ក៏ដោយ។ Neymar មិនអាចជួយប្រេស៊ីលលេងពាននេះបានទេ ដោយសារតែរូបគេមានរបួសអំឡុងពេលលេងមិត្តភាពទល់ក្រុមកាតាកន្លងទៅ៕ប្រភព៖ Foxsports