ពានរង្វាន់ Champions League ប្រចាំរដូវកាល ២០១៨/១៩ នេះ ពុំបានរុញឲ្យហង្សក្រហមឡើងមកឈរចំណាត់ថ្នាក់ល្អដាច់គេនោះទេ ព្រោះបើតាមការចាត់ចំណាត់ថ្នាក់នៃកម្រិត Coefficient Ranking សម្រាប់ ៥ ឆ្នាំម្តង Liverpool ត្រឹមមកឈរលេខ ១១ តែប៉ុណ្ណោះ។
ការចាត់ចំណាត់ថ្នាក់នេះធ្វើឡើងទាំងសម្រាប់ក្រុមតតាំងនៅ Champions League និង Europa League នា ៥ រដូវកាលកន្លងទៅ ក្នុងនោះក្លឹប Real Madrid បន្តឈរលេខ ១ មាន ១៤៦ ០០០ ពិន្ទុតាមពីក្រោយដោយ Barcelona មាន ១៣៨ ០០០ ពិន្ទុ។
បន្តបន្ទាប់មានដូចជា Bayern Munich (១២៨ ០០០ ពិន្ទុ), Atletico Madrid (១២៧ ០០០ ពិន្ទុ), Juventus (១២៤ ០០០ ពិន្ទុ), Manchester City (១០៦ ៦០០ ពិន្ទុ), Sevilla (១០៤ ០០០ ពិន្ទុ), Paris Saint-Germain (១០៣ ០០០ ពិន្ទុ), Arsenal (១០១ ០០០ ពិន្ទុ) និង Porto (៩៣ ០០០ ពិន្ទុ) ចំណែកឯក្រុមម្ចាស់ជើងឯករដូវកាលនេះឈរលេខ ១១ មាន ៩១ ០០០ ពិន្ទុ ស្របពេល Man Utd លេខ ១៨ មាន ៧៨ ០០០ ពិន្ទុស្មើ Tottenham។ ប្រភព៖ AllFootball
