ការធ្លាក់អន់ថយនៃប្រព័ន្ធលេងរបស់ក្លឹប Real Madrid ជាកត្តាជំរុញកាន់តែខ្លាំងឲ្យលោក Florentino Perez ព្យាយាមរកវិធីសាស្រ្តដើម្បីបញ្ចុះបញ្ចូលនាំយកខ្សែប្រយុទ្ធមានគុណភាពណាមួយរូប ដើម្បីមកប្រជែងនឹង Lionel Messi ដែលកំពុងឈរជាស្តេចបាល់ទាត់លេចធ្លោនៅក្របខ័ណ្ឌ LaLiga របស់អេស្ប៉ាញ។
Gareth Bale ដែលឈរជើងក្នុងក្លឹបស្រាប់ មិនអាចដោះស្រាយបញ្ហានេះបានឡើយ បែបនេះជម្រើសដ៏ល្អពីរគឺ រវាង Neymar និង Kylian Mbappe។ ជាង ៣ ឆ្នាំមកហើយ Perez តាមសម្លឹងខ្សែប្រយុទ្ធប្រេស៊ីលមិនដាក់ភ្នែក ប៉ុន្តែចូលដល់សម័យកាលបច្ចុប្បន្ននេះគឺការជ្រើសយក Kylian Mbappe ជាជម្រើសទីមួយដែលសក្តិសមបំផុត។
យោងតាមសារព័ត៌មានក្រៅស្រុកបានឲ្យដឹងថាត្បិត Madrid ត្រូវបោះទុនចន្លោះ ២៥០ ទៅ ៣០០ លានអឺរ៉ូក្នុងការនាំយកខ្សែប្រយុទ្ធវ័យ ២០ ឆ្នាំ ក៏លោក Perez មិនខ្លាចនឹងចំណាយនោះដែរ ប៉ុន្តែជាបញ្ហាចោទគឺត្រង់ថាតើរកវិធីបែបណា ដើម្បីយកស្មៅខ្ចីមួយនេះចេញពីមាត់ប្រធានក្លឹប PSG លោក Nasser Al-Khelaifi។
បើនិយាយពីឥទ្ធិពលរបស់ Zinedine Zidane គឺរូបលោកធ្លាប់ទាក់ទងទៅកីឡាករបារាំងតាំងពី ៥ ឆ្នាំមុនមកម្ល៉េះ ដូច្នោះក្តីសង្ឃឹមសេសសល់តែមួយគត់គឺមានតែរង់ចាំអុតមើលនៅទីផ្សារដោះដូររដូវក្តៅខាងមុខទាំងអស់គ្នា។ ប្រភព: 9SportPro