ក្រុម Chelsea បានបរាជ័យក្រោមថ្វីជើង Everton ២-០ ក្នុងការប្រកួតលីគកំពូលអង់គ្លេស ហើយបាត់៣ពិន្ទុយប់មិញនេះទៀតសោត បានធ្វើឱ្យពួកគេបាត់បង់ឱកាសចូល Top4 បាត់ហើយ។តោខៀវ ហាក់ធ្វើមិនបានល្អឡើយក្នុងការប្រកួតក្រៅដី។ ជាក់ស្ដែងពួកគេចាញ់៤ប្រកួតទៅហើយ ក្នុងការប្រកួត៥លើកចុងក្រោយ ហើយរបូតគ្រាប់បាល់ដល់ទៅ១៥គ្រាប់ឯណោះ។ ទន្ទឹមនឹងទម្រង់លេងមិនល្អនៅក្រៅដីនេះ លោក Sarri បានបញ្ជាក់ថាក្រុមទាំងមូលកំពុងបាត់បង់ម្ចាស់ការ។ ពួកគេមិនថាត្រូវលេងយ៉ាងណាឡើយ នៅពេលក្រៅទឹកដី។បុរសសញ្ជាតិអ៊ីតាលីខាងលើបានបន្ដទៀតថាក្រុម Chelsea នឹងមិនអាចលេង Champions League បានឡើយ នៅរដូវកាលក្រោយ បើពួកគេបន្ដលេងដូច្នេះ ឬលេងដូចតង់ទី២ទល់ក្រុម Everton នេះ។ វាពិតជាពិបាកពន្យល់ណាស់សម្រាប់ការលេងរបស់ពួកគេ ដែលល្អត្រឹមតង់ទី១ និងចូលតង់ទី២ ពិបាកមើលយ៉ាងនេះ។
ឆ្លងកាត់៣០ប្រកួតនៅរដូវកាលនេះ ក្រុម Chelsea កំពុងឈរនៅចំណាត់ថ្នាក់លេខ៦ក្នុងតារាងលីគកំពូលអង់គ្លេស។ ពួកគេមាន៥៧ពិន្ទុ ចាញ់ក្រុមលេខ៤ Arsenal ៣ពិន្ទុ និងក្រុមលេខ៣ Spurs ៤ពិន្ទុ។ ការប្រកួតនៅសល់៨ប្រកួតទៀត នឹងចប់រដូវកាលនេះហើយ៕
ប្រភព៖ DailyMail