នៅថ្ងៃឆ្លងឆ្នាំកន្លងទៅនេះ អ្នកប្រដាល់អាមេរិក Floyd Mayweather បានឡើងសង្វៀនជាថ្មី ដោយបានយកឈ្នះលើកីឡាករវ័យក្មេងមិនដែលចាញ់របស់ជប៉ុន Tenshin Nasukawa យ៉ាងស្រួល។
ការប្រកួតនោះ Floyd ប្រើពេលត្រឹមតែ២នាទីប៉ុណ្ណោះ ដើម្បីផ្ដួល Tenshin បាន។ ដោយការប្រើពេលត្រឹម២នាទីនេះ អ្នកប្រដាល់មិនដែលចាញ់របស់អាមេរិក ហាក់មិនចាំបាច់ហត់អ្វីឡើយ ហើយបានតម្លៃខ្លួនរហូតដល់៩លានដុល្លារឯណោះ។ អ្នកគាំទ្រជាច្រើនហាក់ដូចជាមិនពេញចិត្តចំពោះការរៀបចំនេះទេ ត្បិតអីគីឡូនិងបច្ចេកទេសវាយខុសគ្នាឆ្ងាយណាស់។ Floyd ជាអ្នកប្រដាល់សកលរាប់ឆ្នាំមកហើយ ខណៈដែលកីឡាករវ័យក្មេង Tenshin វិញ រូបគេមានប្រវត្តិល្អក្នុងការប្រកួតប្រដាល់សេរីប៉ុណ្ណោះ។
ប្រភពមួយចំនួនបានបញ្ជាក់ថាការប្រកួតនេះ គ្រាន់តែជាការប្រកួតមិត្តភាពឆ្លងឆ្នាំសកលទេ។ ដូច្នេះហើយ ទើបអ្នករៀបចំចាប់គូនេះឡើងប្រកួត ដោយសារតែពួកគេទាំងសងខាងបានយល់ព្រមគ្នារួចទៅហើយ៕ប្រភពDailyMail
