ក្តីសង្ឃឹមលើកពាន ៣ ក្នុងរដូវកាលតែមួយ ពេលនេះ Manchester City សេសសល់ត្រឹម ២ មាន Premier League និង FA Cup ខណៈ UEFA Champions League ជាពានធំអាចរីកទាំងឈ្មោះ រីកទាំងហោប៉ៅក្លឹប សន្មត់ថាចប់ដោយបរិបូរណ៍ត្រឹមវគ្គ ៨ ក្រុមចុងក្រោយ ក្រោមថ្វីជើងរបស់ស្តេចយក្សគីឡូធ្ងន់ Real Madrid។
លទ្ធផលនៅជើងទី ១ ស្មើគ្នា ៣-៣ នៅឯ Bernabeu ដល់ចូលមកដល់ជើងទីពីរ រាងធូរគ្រាប់ជាងមុន បន្ថែមសងខាងម្នាក់មួយនាំឲ្យលទ្ធផលស្មើ ៤-៤ ហើយបន្តឆ្ពោះទៅដល់ការស៊ុតប៉េណាល់ទីសម្រេចចាញ់ឈ្នះ គឺម្ចាស់ផ្ទះបរាជ័យ ៣-៤ ក្រោមថ្វីជើងភ្ញៀវ។ យ៉ាងណាតួឯកក្រៅផ្លូវការនៅរាត្រីយប់មិញ មិនមែនជាអ្នកស៊ុត មិនមែនជាអ្នកដឹកបាល់ ផ្ទុយទៅវិញ គឺជាអ្នកសង្រ្គោះដៃស្អិតអ៊ុយក្រែននៅជញ្ជាំងក្រោមឯណោះ។
CTS SPORTS បង្ហាញខ្លះៗអំពី Andriy Lunin ឲ្យបងប្អូនបានស្គាល់ មុនគេឡើងកូតកាន់តែខ្ពស់ជាងនេះ នៅពេលវេលាដ៏ខ្លីខាងមុខ។ ជាកីឡាករកើតនៅទីក្រុង Krasnograd នាថ្ងៃទី ១១ កុម្ភៈ ឆ្នាំ ១៩៩៩ គិតមកទល់ពេលនេះ មានវ័យ ២៥ ឆ្នាំ កម្ពស់ ១,៩១ ម៉ែត្រ ល្អដៃសង្រ្គោះ រីឯចំពោះជំនាញជើង គឺផ្នែកស្តាំ។
ដើមឡើយនៅឆ្នាំ ២០១៥ Lunin គេហ្វឹកហាត់នៅឈុតថ្នាល Dnipro ក្នុងប្រទេសកំណើត រហូតដល់ឆ្នាំ ២០១៨ ត្រូវបានស្តេចស Madrid មើលឃើញសមត្ថភាព ក៏បានចាយលុយ ៨,៥០ លានអឺរ៉ូ ថ្ពក់យកគេមកចូលរួម ក្នុងតំណែងជាដៃទីបី។ ពេលនោះ Lunin មានការខិតខំជាខ្លាំង ហើយមិនបដិសេធនោះទេ ក្នុងការផ្ទេរចេញក្នុងលក្ខខណ្ឌខ្ចីជើង ដូចការទៅលេងឲ្យ Leganes ឲ្យ Real Valladolid ក៏មានទាំង Real Oviedoធ្វើម៉េចឲ្យតែបានបទពិសោធន៍ ដោតការជឿជាក់បន្ថែមពីក្លឹបក្នុងក្តីស្រមៃ។
រហូតបន្តមកដល់រដូវកាល ២០២៣/២៤ គេហាក់ផ្តើមទទួលបានឱកាស ទោះវាស្ដួចស្ដើងត្រឹមដៃទីបី ពីក្រោមឈ្មោះ Thibaut Courtois និង Kepa Arrizabalaga ក៏ដៃពីងពាងអ៊ុយក្រែននៅតែមានការស្មិងស្មាធិ៍ ខិតខំអស់ពីពោះ ចាប់យករាល់ឱកាសដែលមាន។ ត្រឹមតែរយៈពេលខ្លី Lunin គេអាចថ្ពក់យកការជឿទុកចិត្តពីអ្នកចាត់ការលោក Carlo Ancelotti ហ៊ានផ្តល់ពេលវេលាសម្រាប់គេជាពិសេសនៅ Champions League ដូចកាលប៉ះ RB Leipzig បុរសមិនសូវចេះមាត់កម្នាក់នេះ សង្រ្គោះបាល់បាន ៩ លើក ដល់តែប៉ះ Man City កាលជើងទីមួយមិនសូវល្អ តែជើងទីពីរ មិនសរសើរមិនបាន គេក៏លោតទះបាល់ ទប់បាល់ ដល់ទៅ ៨ លើក នៅឯកីឡដ្ឋានដ៏គួរឲ្យខ្លាចសម្រាប់ Real គឺ Etihad Stadium។
វាកាន់តែអស្ចារ្យគឺបានការសង្រ្គោះបាល់ប៉េណាល់ទី ២ លើករបស់ Lunin នេះហើយ Save គ្រាប់របស់ Bernardo Silva និង Mateo Kovacic ទើបជាអ្នកសម្រេចឲ្យ Madrid អាចយកឈ្នះទៅលើក្លឹបការពារជើងឯកខាងលើ នាំឲ្យទទួលបានកៅអីឆ្ពោះទៅវគ្គពាក់កណ្តាលផ្តាច់ព្រ័ត្រ ត្រៀមប៉ះ Bayern Munich នៅចុងខែមេសាខាងមុខ។
ខណៈនេះម៉ោងនេះ Lunin កំពុងក្លាយជាតួឯកក្នុងដួងចិត្តរបស់អ្នកគាំទ្ររាល់គ្នា ហើយបានរំអុកឲ្យក្លឹបប្រញាប់ចាត់ចែងតកុងត្រាជាបន្ទាប់សម្រាប់គេ ដ្បិតអីសុពលភាពសព្វថ្ងៃត្រូវផុតនៅចុងខែមិថុនា ឆ្នាំក្រោយ។ នេះតាមការព្យាករណ៍ប្រសិនអធិរាជស បានឈ្នះពាន UCL ផង ហើយថែម Lunin ទទួលបានកុងត្រា ៣-៥ ឆ្នាំបន្ថែមផង ម្ល៉េះហាងឆេងតម្លៃខ្លួនថ្មីសម្រាប់គេ គឺមិនក្រោម ១០០ លានអឺរ៉ូនោះទេ ពោលរាប់ជាការចំណេញលើស ១ គុណជា ១០ សម្រាប់ក្លឹបពូកែវិនិយោគកើបផលចំណេញមួយនេះបន្ថែមទៀតហើយ៕
ប្រភព៖ បរទេស