ពាក្យសន្យា បើហាចេញពីមាត់កូនប្រុសហើយ ចង់មិនចង់គឺចាំបាច់ត្រូវតែធ្វើ តែម្តងម្កាលបើចេញពីមាត់ស្រីៗ ពួកគាត់ធ្វើភ្លេចធ្វើរំលងខ្លះក៏អត់អីដែរ។ ឃ្លានេះនិយាយលេងទេបងប្អូន ងាកមកក្នុងពិភពបាល់ទាត់យើងវិញ នៅក្លឹបសំពៅមាស Manchester City ឯណោះ ក៏ត្រៀមនឹងកើតរឿងចម្លែកឥតធ្លាប់មានពីមុនមក ឲ្យតែហ៊ាន Rodri បំប៉ោងសំណាញ់ទី ៣ គ្រាប់ថែមទៀត មុនបិទបញ្ចប់រដូវកាលទូទាំងតំបន់អឺរ៉ុប នាកំឡុងចុងខែឧសភា។
ក៏ត្រង់ថា DMF ឬបងប្អូនស្គាល់ជាតំណែង ខ្សែបម្រើការពារ សញ្ជាតិអេស្ប៉ាញខាងលើ បានដាក់ខសន្យាជាមួយមិត្តរួមក្លឹបទាំងអស់ ថាប្រសិនណារដូវកាល ២០២៣/២៤ គេអាចរកបានសរុប ១០ គ្រាប់ នោះមិនថាកីឡាករចាស់ថ្មី ឲ្យតែមានឈ្មោះនៅឈុតធំ ក្នុងការប្រកួតផ្លូវការ តម្រូវឲ្យពួកគេត្រូវតែតឺនុយ ឬសន្លោះអាវក្នុងខោ ដូចជាអ្វីដែលខ្លួនទម្លាប់ធ្វើរៀងរាល់ការប្រកួតយ៉ាងដូច្នោះដែរ។
ដូចធ្លាប់បានដឹង មួយក្រុម Man City តាំងពីអ្នកចាំទី ដល់ប្រយុទ្ធ គ្មាននរណាទម្លាប់តឺនុយក្នុងការប្រកួតទេ លើកលែងតែអតីតខ្សែបម្រើក្លឹប Atletico Madrid ខាងលើមួយរូបគត់ ដែលការប្រកួតក្តៅគគុកតានតឹងយ៉ាងណា ក៏ឈុតរបស់គេនៅតែភ្លឹងស្អាត អាវជាប់ក្នុងខោជានិច្ច។
ដល់ហើយគេក៏ចង់ឃើញអ្នករាល់គ្នាអនុវត្តសកម្មភាពចម្លែកមួយនេះ (បញ្ជាក់៖ យើងប្រើពាក្យចម្លែក មិនសំដៅថាជាកាយវិការមិនល្អនោះទេ គ្រាន់ថាវាខុសប្លែកពីកីឡាករទូទៅតែប៉ុណ្ណោះឯង) ទៅលើគ្រប់បណ្តាមិត្តរួមទ្រនំក្រោមការដឹកនាំរបស់លោក Pep Guardiola ទាំងអស់។ Rodri បញ្ជាក់ថ្មីថ្មោងយ៉ាងដូច្នោះ៖ “ខ្ញុំបាននិយាយជាមួយកីឡាករក្នុងក្រុម ថាបើខ្ញុំ រកបាន ១០ គ្រាប់រដូវកាលនេះ ពួកគេត្រូវតែយល់ព្រមដាក់អាវចូលក្នុងខោក្នុងការប្រកួតណាមួយដូចជាខ្ញុំព្រមគ្នា រួមបញ្ចូលទាំង Ederson”។
ដល់តែគិតមកទល់ម៉ោងនេះថ្ងៃនេះ កីឡាករមាឌឌាំងកម្ពស់បាន វ័យ ២៧ ឆ្នាំ គេសម្រេចរកបាន ៧ គ្រាប់ហើយ ខណៈការប្រកួតនៅលីគកំពូល Premier League សេសសល់ ៩ ជុំ នៅ UEFA Champions League សេសសល់ ៥ ប្រកួត និង FA Cup សល់ ២ ប្រកួត ស៊ីសងលើសមិទ្ធផលក្លឹបសម្រេច។ បែបនេះ ៣ គ្រាប់ បើថ្លឹងឲ្យធ្ងន់ទៅ ក៏មិនជាពិបាកយកពេកដែរ។
មួយទៀតបើយើងមើលកំណត់ត្រាដែលកំពុងឆ្លាក់ជាប់នឹងឈ្មោះ ខ្សែបម្រើបិទក៏ជាប់រាប់តួលេខ G/A ក៏ទៅរួច គឺគេមិនទាន់ស្គាល់បរាជ័យនៅឡើយ ក្នុងការប្រកួតទាំង ៦៣ លើកជាប់ៗគ្នា ប្រហាក់ប្រហែលនឹងកំឡុងពេល ៤២០ ថ្ងៃ នេះក្នុងប្រវត្តិសាស្ត្រក្របខ័ណ្ឌ Premier League ទើបតែមាន Rodri ម្នាក់គត់អាចធ្វើបាន។
រំឭកឲ្យដឹង កាលបរិច្ឆេទប្រកួតបន្ទាប់សំពៅមាសត្រូវជួប Aston Villa និង Crystal Palace នៅថ្ងៃទី ០៤ និង ០៦ មេសាខាងមុខ។ អ៊ីចឹងរង់ចាំទស្សនាលើទំព័រ CTS SPORTS ដូចគ្នា ព្រោះថាមិនត្រូវមើលមិនឃើញ ៣ គ្រាប់ចេញពីថ្វីជើង Rodri អាចនឹងបញ្ចប់ត្រឹមសប្តាហ៍នេះផង៕
ប្រភព៖ បរទេស