Darren Jason Watkin Jr. ឬបងប្អូនយើងស្គាល់ជា IshowSpeed ដែលមាន Subscriber ជាង ២៣,៤ លាននាក់លើ YouTube កន្លងទៅថ្មីៗនេះ បានប្រកាសបង្ហាញនូវកាដូមានតម្លៃរាប់សិបមុឺនដុល្លារ ទិញជូនខ្លួនឯងជាលើកដំបូងក្នុងឆាកជីវិត ហើយក៏មានពាក់ព័ន្ធនឹងទឹកចិត្តស្រលាញ់គាំទ្រ Cristiano Ronaldo ដោយឥតញញើតនោះដែរ។
តារា YouTuber ក៏ត្រូវបានគេស្គាល់ជា Rapper មួយរូប ខាងលើ បានចាប់ផ្តើមប្រលូកក្នុងវិស័យមួយនេះតាំងឆ្នាំ ២០១៧។ ដំបូងឡើយគេមានបង្ហោះនូវមាតិកានៃការលេងហ្គេមដូច FIFA, Fortnite និង Roblox ជាដើម លុះក្រោយៗមកឃើញប្រឡូកទៅក្នុងវិស័យបាល់ទាត់ ដូចការលើកឡើងពាក់ព័ន្ធនឹង Cristiano Ronaldo, Lionel Messi និងការចុះទៅទស្សនានៅកីឡដ្ឋានផ្ទាល់ធំៗមួយចំនួន។
យុវជនសញ្ជាតិអាមេរិក ដែលកើតនៅថ្ងៃទី ២១ មករា ឆ្នាំ ២០០៥ មានកម្ពស់ ១,៧៥ សព្វថ្ងៃមានអាយុ ១៩ ឆ្នាំ នរណាក៏ដឹងដែរ ថាគេជាអ្នកគាំទ្រដ៏ងប់ងុលរបស់ស្តេចបាល់ទាត់ព័រទុយហ្គាល់ Cristiano Ronaldo។ ហេតុផលនេះបូកផ្សំនឹងភាពក្រមិចក្រមើម ចរិតលក្ខណៈខុសប្លែកពីមនុស្សទូទៅ កាន់តែរុញឲ្យ Speed គេទទួលបានភាពល្បីរន្ទឺឡើងពីមួយថ្ងៃទៅមួយថ្ងៃ រហូតដល់ថ្ងៃនេះ ក៏ក្លាយជាសេដ្ឋីវ័យក្មេងត្រឹមមួយពព្រិចភ្នែក។
គេទើបតែបានទិញ Super Car ម៉ូដែល Lamborghini Huracan មកបិទតែមលេងម៉ូតតាមចំណង់ចិត្តមួយទំហឹង ដោយមានរចនាបថពីរពណ៌ បៃតង និងក្រហមក្រមៅតំណាងឲ្យទង់ជាតិប្រទេសព័រទុយហ្គាល់ និងរូប Cristiano Ronaldo លោតស្ទាយអបអរ “Siuuuuuu” លើផ្នែកខាងមុខរថយន្ត បង្ហាញច្បាស់ៗថាខ្លួនជាអ្នកគាំទ្រដ៏ងប់ងុលរបស់តារាឆ្នើមនៃក្លឹប Al-Nassr។
ទាំងតម្លៃរថយន្ត និងការតុបតែងផ្សេងៗ Speed អះអាងថាខ្លួនចាយលុយអស់ ៥០ មុឺនឬល្បាក់កន្លះលានដុល្លារអាមេរិក ខណៈតាមរបាយការណ៍ចុងក្រោយធ្លាប់ចុះផ្សាយ បានប៉ាន់ប្រមាណទ្រព្យសម្បត្តិរួមរបស់ក្មេងតូចខាងលើ មានសរុបចន្លោះ ១០ ទៅ ១២ លានដុល្លារ។ បញ្ជាក់ចំពោះរថយន្តស្ព័រខាងលើ ត្រូវបានបំពាក់ដោយម៉ាស៊ីនចំណុះ ៥,២ លីត្រ V-10 ដែលអាចផលិតកម្លាំង ៦៣១ សេះ អាចបង្កើតល្បឿនជាអតិបរិមា ៣២៥ គ.ម/ម៉ ជាមួយកម្លាំងស្ទុះពី ០-១០០ គ.ម/ម៉ ប្រើពេលត្រឹម ២,៩ វិនាទីប៉ុណ្ណោះ។
គួរឲ្យដឹងដែរថា Speed ដែលមានអាយុបង ៦ ឆ្នាំធៀបនឹងកូនប្រុសច្បងរបស់ Ronaldo គឺ Cristiano Jr កន្លងមកក៏អ្នកទាំងពីរធ្លាប់បានជួបគ្នា រួមទីលាននៅឈុតថ្នាលនឹងគ្នាដោយផ្ទាល់ផងដែរ ដូចកាលប្រកួតមិត្តភាព Riyadh Cup គ្រាឈុតធំ Al-Nassr ប៉ះ Inter Miami។
ចុងក្រោយងាកទៅមើលតារាបាល់ទាត់ចាស់វស្សាវ័យ ៣៩ ឆ្នាំបន្តិចវិញ យប់មិញនៅជ័យជម្នះយកឈ្នះ ៥-១ ទៅលើ Al-Tai ក៏លោកចូលរួមចំណែករកបានគ្រាប់បាល់ Hat-trick យ៉ាងវិសេសផងដែរ ដែលវាជា Hat-trick ទី ៦៤ ក្នុងអាជីពច្រើនដាច់គេបង្អស់ហើយក្នុងលោក ខណៈស្ថិតិនៅ SPL ចាប់តាំងការផ្ទេរមក ៣៩ ប្រកួត អាចរកបានដល់ទៅ ៤០ គ្រាប់ បន្ថែម ១១ Assists និង Hat-trick ៤ លើក ក៏ជាមួយការឈ្នះនាមកីឡាករល្អបំផុតប្រចាំខែ Player of the Month Awards ៤ លើកដូចគ្នា៕
ប្រភព៖ បរទេស