២០០៩,១០,១១,១២,១៥,១៩,២១ និង ២០២៣ គឺជាសម័យកាលទាំង ៨ ដែលស្តេចបាល់ទាត់អាហ្សង់ទីន Lionel Messi ត្រូវបានប្រកាសទទួលស្គាល់ជាម្ចាស់ពានឯកត្តជនកីឡាករល្អបំផុតប្រចាំឆ្នាំ Ballon d’Or ក៏រាប់ជាអ្នកឈ្នះច្រើនបំផុតផងដែរ ឥតធ្លាប់មានក្នុងប្រវត្តិសាស្រ្តបាល់ទាត់។
ហែលកាត់បទពិសោធន៍ក្រាស់ក្រែល ក៏ជាកត្តាដែលនាំឲ្យម្ចាស់ជើងឯក World Cup អាចដាក់ភ្នែកមើលនរណាម្នាក់មិនងាយខុសឡើយ ជាក់ស្ដែងកន្លងទៅលោកធ្លាប់បានបង្ហាញការព្យាករណ៍នូវយុវជន ៤ រូប មានឥទ្ធិពលខ្ពស់នឹងអាចក្លាយជាម្ចាស់ពានរបស់ France Football នាពេលអនាគត។
ខ្សែប្រយុទ្ធកំពុងប្រកបអាជីពឲ្យក្លឹបនៅ MLS វ័យ ៣៦ ឆ្នាំ លើកឡើង៖ “បើសួរខ្ញុំអំពីកីឡាករដែលនឹងអាចមានលទ្ធភាពប្រជែងពាន Ballon d’Or នៅឆ្នាំខាងមុខ? នោះគឺនឹងមានការប្រកួតប្រជែងដ៏ជក់ចិត្តដូចកីឡាករ Erling Haaland, Kylian Mbappe, Vinicius Jr និងកីឡាករវ័យក្មេងផ្សេងទៀត ដែលខ្ញុំក៏គិតដល់ Lamien Yamal”។
លោកបន្តថា៖ “គេម្នាក់នេះ នៅក្មេង ហើយកំពុងលេងឲ្យ Barcelona ទៅមុខនឹងចូលរួមក្នុងតំណែងដ៏សំខាន់ តែក៏អាចមានអ្នកផ្សេងជាកីឡាករថ្មីៗបន្ថែមទៀត យើងមិនអាចដឹងជាមុន ជារួមទៅ នឹងក្លាយជារជ្ជកាលថ្មី ដែលនឹងរីករាយក្នុងការទស្សនាជាទីបំផុត”។
ការលើកឡើងនេះ ហាក់ធ្វើឲ្យអ្នកគាំទ្រមួយចំនួនមានការភ្ញាក់ផ្អើល ត្រង់បានរាប់រំលងឈ្មោះខ្សែបម្រើពូកែបញ្ចប់ទី Jude Bellingham ដែលពេលចុងក្រោយគេបានឈ្នះពាន Kopa Trophy និងឈរលេខរៀងទី ១៨ នៅចំណាត់ថ្នាក់ Ballon d’Or។ រួចបើមើលអំពីស្ថិតិរបស់គេ ក៏ខ្លាំងណាស់ដែរ ៣១ ប្រកួត អាចរកបានដល់ទៅ ២០ គ្រាប់និង Assist ៩ លើកឯណោះ។
ចុងក្រោយពាក់ព័ន្ធនឹងដំណើរចូលនិវត្ត ដែលខាងគូប្រជែង Cristiano Ronaldo ធ្លាប់បានគូស្នេហ៍ Georgina Rodriguez បង្ហើបថា ទំនង ២-៣ ឆ្នាំទៀត ពោលអាចចូលល្បាក់អាយុ ៤១ ឬ ៤២ ឆ្នាំ។ ដល់តែថ្ងៃនេះ Messi ឆ្លើយតបជុំវិញអនាគតរបស់ខ្លួនជាថ្មី ក្រោមចម្លើយយ៉ាងខ្លី បើនៅលេងល្អគឺបន្ត តែបើធ្លាក់ទម្រង់ហើយគឺនឹងប្រកាសព្យួរស្បែកជើង។
អតីតតារាឆ្នើម Barca បន្តរៀបរាប់៖ “ខ្ញុំនឹងសម្រេចចិត្តចូលនិវត្តក្នុងពេលវេលាដែលមើលឃើញខ្លួនឯងមិនអាចបង្ហាញនូវកម្រិតដែលខ្ញុំរីករាយនឹងចង់បាន និងនៅពេលដែលខ្ញុំមើលឃើញខ្លួនឯងលែងអាចជួយមិត្តរួមក្រុម ដូចនិយាយតាំងពីដំបូង មនុស្សខ្ញុំដឹងខ្លួនឯងច្បាស់ ថាពេលណាខ្លួនឯងល្អ ពេលណាខ្លួនអាក្រក់ ដូច្នេះបើដើរដល់អារម្មណ៍មួយនោះ ក៏វានឹងជាពេលវេលាក្នុងការបោះជំហានបន្ទាប់ដែរ ពោលមិនគិតលើកត្តាអាយុជាធំឡើយ”។
នេះចប់ EURO 2024 ខាងមុខ សម្រាប់បុរសមានដើមកំណើតចេញពីទីក្រុង Rosario នឹងឈានចូលអាយុ ៣៧ ឆ្នាំហើយ ដោយឡែកបើរង់ចាំដល់ចប់ World Cup 2026 នឹងបន្ថែមតួលេខដល់ ៣៩ ឆ្នាំ។ ចុះយោបល់របស់គ្នាយើងវិញ គិតថា Messi អាចនឹងព្យួរស្បែកជើងនៅអាយុប៉ុន្មាន ហើយជាមួយការឈរជើងឲ្យក្លឹបចុងក្រោយណាដែរទៅ?
ប្រភព៖ បរទេស