រាប់ចាប់តាំងពីថ្ងៃទី ១៦ មករា មកទល់សព្វថ្ងៃចូលជាងពីរខែហើយដែលអ្នកចាត់ការលោក Jose Mourinho មិនមានទ្រនំឈរជើង ដោយឡែកបើសួរថា តើអនាគតទៅមុខលោកនឹងចាប់យកក្លឹបណាបន្ទាប់ទៀត? ចម្លើយអាចមានច្រើន តែមួយក្នុងចំណោមនោះ គឺបដិសេធយ៉ាងដាច់អហង្ការ ពោលបណ្តាក្លឹបទាំងអស់នៅអារ៉ាប៊ីសាអូឌីត ឬ Saudi Pro League នឹងមិនស្ថិតក្នុងការពិចារណារបស់លោកទេ។
គ្រូសញ្ជាតិព័រទុយហ្គាល់ ធ្លាប់មានរបាយការណ៍ថា បដិសេធប្រាក់វាល់លានកាលពីចុងខែមករា ត្រង់ក្លឹប Al-Shabab នៅ SPL ពិតជាបានទាក់ទងមក យ៉ាងណា Mourinho មិនចាប់អារម្មណ៍ទាល់តែសោះឡើយ។ នៅពីក្រោយនោះ មានហេតុផល ៣ ចំណុចគត់ សម្រេចឲ្យគ្រូវ័យ ៦១ ឆ្នាំ ហ៊ាននិយាយថា “ទេ” ទៅកាន់ឃ្លាំងលុយដោយឥតញញើតមាត់។
អតីតអ្នកចាត់ការក្លឹប FC Porto បានរៀបរាប់កាលពីពេលថ្មីថ្មោង៖ “ខ្ញុំយល់ថា Cristiano ជាអ្នកបើកទ្វារ ក៏ហៅបានជាអ្នកចាប់ផ្តើមឲ្យអ្នករាល់គ្នាដាក់ការជឿជាក់ថា គ្រប់យ៉ាងវាអាចកើតឡើងទៅរួចនៅអារ៉ាប៊ីសាអូឌីត ទាំងការរស់នៅ ការរីករាយនៅទីនោះ ការអភិវឌ្ឍដែលចង់ឲ្យវិស័យបាល់ទាត់មានភាពខុសប្លែកឡើង”។
លោកបន្តថា៖ “តែយ៉ាងណា នេះវាត្រឹមជាចំណង់ ហើយការអភិវឌ្ឍបាល់ទាត់ពិតប្រាកដ វាមិនអាចកើតឡើងទៅឡើយ ខ្ញុំយល់ថា ហិរញ្ញវត្ថុរបស់យើងម្នាក់ៗពិតជាសំខាន់ ខ្ញុំធ្លាប់ទទួលបានសំណើពីខាងនោះដែរ តែខ្ញុំបានបដិសេធ ព្រោះទី ១) គឺ Roma ពិតជាសំខាន់សម្រាប់ខ្ញុំ ទី ២) គឺកាតព្វកិច្ចនៃបាល់ទាត់អឺរ៉ុបដែលកំពុងមាន និងទី ៣) គឺឆន្ទៈរបស់ខ្ញុំផ្ទាល់”។
“តែថ្ងៃនេះខ្ញុំមកអារ៉ាប៊ីសាអូឌីត គឺដើម្បីមកកម្សាន្តរយៈពេល ៣ ថ្ងៃ មកមើលប្រដាល់ មកមើលការប្រណាំងរថយន្ត Formula 1 ជាមួយមិត្តភក្តិ តែមិនបានមកចុះកុងត្រាណាមួយឡើយ ណាមួយដោយសារខ្ញុំមានពេលវេលាសម្រាកដើម្បីធ្វើការសម្រេចចិត្តដ៏ត្រឹមត្រូវមួយផងមុនរដូវក្តៅមកដល់”។
រំឭកថា កាលនៅក្លឹបចាស់ក្នុងទឹកដីអ៊ីតាលី Mourinho គេរកបានជាង ១៤ លានដុល្លារ/ឆ្នាំ ហើយជួយក្លឹបសាងកំណត់ត្រាកាន់ពានអឺរ៉ុប Europa Conference League ជាលើកដំបូងបានមួយគ្រឿង។ តាមពិតជាមួយខាងអារ៉ាប៊ីសាអូឌីតមិនត្រឹមតែក្លឹបចង់បានទេ សូម្បីជម្រើសជាតិនៅអាស៊ីមួយនោះ ក៏ធ្លាប់ល្ហៀងៗចង់ថ្ពក់យកវត្តមាន Mourinho ទៅដឹកនាំផងដែរ ពោលតាំងឆ្នាំទៅ ២០២៣ លឺហ៊ានឲ្យជិត ៦៥ លានដុល្លារ/ឆ្នាំ បើព្រមទៅដឹកនាំ ២ រដូវកាល ដែលវាល្មមនឹងរុញឲ្យលោកក្លាយជាអ្នកចាត់ការស៊ីថ្លៃខ្ពស់ដាច់គេក្នុងលោក ពីលើឈ្មោះ Diego Simeone សព្វថ្ងៃ ទទួលបានមួយឆ្នាំល្បាក់ ៥០ លានដុល្លារ។
នេះបើគ្រូជាប់រហស្សនាម “Special One” ពិតជាអាចបន្តរក្សាឆន្ទៈបដិសេធសំណើពីខាងមជ្ឈិមបូព៌ា អ៊ីចឹងការព្យាករណ៍លើភាគរយខ្ពស់ សម្រាប់ទ្រនំបន្ទាប់របស់លោក គឺអាចជាតោខៀវ Chelsea ឬសេះសមុទ្រ Newcastle United ដែលមួយរយៈក្រោយរាងធ្លាក់ទម្រង់ អាចទាមទារការផ្លាស់ប្តូរតំណែងអ្នកចាត់ការ៕
ប្រភព៖ បរទេស