Real Madrid កំពុងបន្តការប្រយុទ្ធរបស់ពួកគេប្រឆាំងនឹងកាតក្រហមរបស់ Jude Bellingham ខណៈដែលគ្រូបង្វឹក Carlo Ancelotti បានចាត់ទុកបម្រាមពីរប្រកួតនេះថាជារឿងហួសចិត្ តនិងមិនត្រឹមត្រូវ។
ខ្សែបម្រើសញ្ជាតិអង់គ្លេសវ័យ ២០ ឆ្នាំរូបនេះត្រូវបានបណ្តេញចេញពីការប្រកួតទល់នឹងក្រុម Valencia កាលពីចុងសប្តាហ៍មុន បន្ទាប់ពីគាត់បានបញ្ចេញប្រតិកម្មទៅលើអាជ្ញាកណ្តាល Jesus Gil Manzano ដែលបានផ្លុំកញ្ចែរបញ្ចប់ការប្រកួតមុនពេល Bellingham ស៊ុតបញ្ចូលទីដែលនឹងក្លាយជាគ្រាប់ជ័យជម្នះឲ្យ Real Madrid។
Madrid បានប្តឹងឧទ្ធរណ៍ដំបូងប្រឆាំងនឹងការព្យួរចំនួនពីរប្រកួតដែលត្រូវបានច្រានចោលដោយគណៈកម្មាធិការការប្រកួតរបស់សហព័ន្ធបាល់ទាត់អេស្ប៉ាញ (RFEF) កាលពីថ្ងៃសុក្រ។
Bellingham មិនត្រូវបានបញ្ចេញឈ្មោះក្នុងក្រុមកីឡាករទាំង ២០ នាក់របស់ Madrid សម្រាប់ដំណើរទស្សនកិច្ចនៅ LaLiga ថ្ងៃអាទិត្យទល់នឹង Celta Vigo នោះទេ ប៉ុន្តែបើយោងតាមរបាយការណ៍ក្រុមកំពូលតារាងបានបើកការប្តឹងឧទ្ធរណ៍ជាមួយតុលាការរដ្ឋបាលកីឡារបស់អេស្ប៉ាញ TAD (Tribunal Administrativo del Deporte) សារជាថ្មី។
លោក Ancelotti បាននិយាយនៅលើគេហទំព័រផ្លូវការរបស់ក្លឹបកាលពីថ្ងៃសៅរ៍ថា៖
“យើងបានប្តឹងឧទ្ធរណ៍ព្រោះយើងជឿថាការដាក់ទណ្ឌកម្មនេះគឺហួសហេតុ និងមិនត្រឹមត្រូវ។ គាត់មិនបានជេរប្រមាថអ្នកណាម្នាក់ដូចដែលបានបង្ហាញក្នុងរបាយការណ៍នោះទេ។…
យើងគិតថាទណ្ឌកម្មនេះមិនត្រឹមត្រូវទេ ហើយនោះជាមូលហេតុដែលយើងប្តឹងឧទ្ធរណ៍”៕
