ពាក់ព័ន្ធរឿងរ៉ាវប៉ះទង្គិចរវាងកីឡាករវ័យក្មេង Lee Kang-in និងរៀមច្បងប្រធានក្រុម Son Heung-min មកទល់ពេលចុងក្រោយ ទោះមានការសម្របសម្រួល ហើយសម្រេចលើកលែងពីសំណាក់សមាជិកក្លឹប Spurs តែងាកទៅតារាឆ្នើមរបស់ក្លឹប Paris Saint-Germain គឺមិនប្រាកដថាចប់តែប៉ុណ្ណឹងទេ ត្រង់គេប្រឈមនឹងល្មើសច្បាប់កិច្ចព្រមព្រៀងរវាងក្រុមហ៊ុនជាដៃគូផ្សព្វផ្សាយ អាចពិន័យប្រាក់ខ្ទង់លានដុល្លារ។
សារថយក្រោយទៅរឿងហេតុកើតឡើងបន្តិច បន្ទាប់តែពីកីឡាករវ័យ ២៣ ឆ្នាំ មិនស្តាប់ការណែនាំរបស់ប្រធានក្រុម Son កាលពីមុនប្រកួតទល់ហ្សកដានីនៅវគ្គ ៤ ក្រុមចុងក្រោយ AFC Asian Cup នាដើមខែ ក៏កើតការប៉ះទង្គិចកាយវិការធ្ងន់ៗចេញពី Kang-in ទៅលើសិស្សច្បងវ័យ ៣១ ឆ្នាំ ដល់របួសផ្នែកម្រាមដៃ រុំបង់អស់រយៈពេលច្រើនថ្ងៃ។
បន្តបន្ទាប់មកខាងសហព័ន្ធបាល់ទាត់កូរ៉េខាងត្បូងក៏ចេញសេចក្តីថ្លែងការណ៍ពាក់ព័ន្ធរឿងនេះ ហើយក្រោយមកក៏សម្របសម្រួលពីភាគីសងខាង រួមទាំងអ្នកចាត់ការ កីឡាកររួមជម្រើសជាតិទាំងអស់ មកទល់ព្រឹកថ្ងៃពុធ ទី ២១ មករា គណនីផ្លូវការរបស់ Son ដែលមាន Follower ១៣,៨ លាននាក់ បានបង្ហោះរូបភាពពោរពេញដោយស្នាមញញឹមជាមួយ Kang-in ហើយសរសេរថា៖ “សួស្តី នេះគឺ Heung-min Son ដោយ Lee Kang-in គេបានទទួលស្គាល់និងសុំអភ័យទោសចំពោះកីឡាករទាំងអស់ក្នុងក្រុម រួមទាំងខ្ញុំផងដែរ”។
“កាលខ្ញុំនៅក្មេង ក៏ខ្ញុំបានបង្កកំហុសជាច្រើនដែរ មើលទៅអាក្រក់ តែគិតថាមុនខ្ញុំមកដល់ចំណុចនេះ គឺពិតជាមានការណែនាំដ៏ល្អ និងបង្ហាត់បង្រៀនពីសិស្សច្បង នេះពួកយើងធានាថា Kang-in គេនឹងមិនបង្កកំហុសបែបហ្នឹងម្តងទៀត តែវាក៏ជាឱកាសឲ្យខ្ញុំជាប្រធានក្រុមស្គាល់ពីសមាជិកកាន់តែច្បាស់ គេពិតជាទទួលពេលវេលាដ៏លំបាក”។
“ខ្ញុំសុំឲ្យអ្នករាល់គ្នា ទទួលយកការអភ័យទោសរបស់គេ ហើយយើងបន្តក្នុងភាពជាក្រុមតែមួយ បាល់ទាត់គឺពោរពេញដោយការស្រលាញ់ ជម្រើសជាតិកូរ៉េខាងត្បូងរបស់យើងនឹងរីកចម្រើនឡើង ជាថ្មីម្តងទៀត តំណាងជាប្រធានក្រុម ខ្ញុំពិតជាមានការសុំទោសជាខ្លាំង”។
បើទោះបីពាក្យសម្តីនេះ ត្រូវបានអ្នកគាំទ្រយល់ស្រប និងទទួលយក តែងាកទៅក្រុមហ៊ុនដែលបានសហការជួល Kang-in ឲ្យផ្សព្វផ្សាយពាណិជ្ជកម្មជូនពួកគេ ហាក់មិនទាន់ព្រមព្រៀងនៅឡើយ។ Sponsor ធំ ២ របស់ខ្សែបម្រើកម្ពស់ ១,៧៣ ម៉ែត្រ មាន Nexon និងក្រុមហ៊ុនទូរគមនាគមន៍ KT បានកំពុងប្តឹងផ្តល់ ល្មមឲ្យកីឡាករវ័យក្មេងខាងលើវិលក្បុងលើខ្ទង់ចំណាយទឹកប្រាក់ពិន័យចន្លោះ ៣,៦ ទៅ ៥,៧ លានដុល្លារ។
ការប្តឹងផ្តល់ចេញពីភាគីក្រុមហ៊ុនដែលបានជួលគេផ្សព្វផ្សាយពាណិជ្ជកម្ម ក៏ដោយសារតែកីឡាករបានបង្កើតភាពចម្រូងចម្រាសខូចឈ្មោះខ្លួនឯងលើបណ្តាញសង្គមជាសាធារណៈ ក៏ជាកត្តានាំឲ្យប៉ះពាល់ដល់យីហោរបស់ក្រុមហ៊ុនផងដែរ។
តួលេខនេះខ្ពស់កប់ពពក ដ្បិតប្រាក់ឈ្នួលសព្វថ្ងៃនៅ PSG ឈរជើងមួយឆ្នាំពេញ អាចទទួលបានត្រឹម ៤,៣ លានដុល្លារប៉ុណ្ណោះ។ បើយើងធៀបនឹងតម្លៃផ្ទះឬភូមិគ្រឹះរបស់កំពូលកីឡាករមួយចំនួន គឺល្មមនឹងលក់ចេញមួយប្លង់ធំ ទើបអាចសងប្រាក់ពិន័យគេរួច៕
ប្រភព៖ បរទេស