ស្តាប់ចំណងជើងប្រហែលគ្រប់គ្នាកំពុងឆ្ងល់ ឬគិតដល់ក្រែងលពួកយើងសរសេរខុស តែនេះវាជាការពិត ដោយព្រឹត្តិការណ៍ដណ្តើមពាន World Cup ពិតជានឹងកើតឡើងនៅល្បាក់ឆ្នាំ ២០២៤ នេះមែន តែគ្រាន់វាមិនមែនជាការប្រកួតប្រជែងក្រោមគណៈរៀបចំកម្មវិធីចេញពី FIFA នោះទេ។
ផ្ទុយទៅវិញ វារៀបចំឡើងដល់ Elite Players Group ហើយដាក់ឈ្មោះពេញព្រឹត្តិការណ៍ថ្មីខាងមុខថា “Over-35 World Cup” ដោយមានការចូលរួមពីក្រុមនៃប្រទេសទាំង ៨ តួយ៉ាងគឺអង់គ្លេស, អាហ្សង់ទីន, ប្រេស៊ីល, បារាំង, អេស្ប៉ាញ, អាល្លឺម៉ង់, អ៊ីតាលី និងអ៊ុយរុយហ្គាយ។ រីឯអ្នកមានសិទ្ធចូលរួមប្រកួតគឺតម្រូវឲ្យមានអាយុ ៣៥ ឆ្នាំឡើងទៅ។ នេះជាឱកាសពិសេសកម្រកើតមាន ត្រូវចិត្តបំផុតសម្រាប់អ្នកគាំទ្រដែលចង់ទស្សនាបច្ចេកទេស តិចនិករបស់ Legend ដែលធ្លាប់តែល្បីល្បាញខ្លាំងកាលពីជាង ១ ទៅ ២ ទសវត្សមុន ដែលពួកគាត់កន្លងមកក៏មិនមានឱកាសបង្ហាញវាមកឲ្យក្មេងជំនាន់ក្រោយបានឃើញ។
ក្រុមហ៊ុនខាងលើហៅកាត់ EPG គឺផ្តួចផ្តើមបង្កើតឡើងដោយអតីតប្រធានក្រុមជម្រើសជាតិចាស់ៗដែលបានចូលនិវត្ត ហើយក្រោមពាក្យស្លោកមួយថា៖ “ចាប់តាំងពីការចូលនិវត្តរបស់ពួកយើង យើងមិនទាន់ទទួលបានឱកាសបង្ហាញខ្លួននៅការប្រកួតផ្លូវការលក្ខណៈអាជីពណាមួយនោះទេ នេះជាហេតុផលនៃការបង្កើត EPG ឡើងមក”។
តាមសារព័ត៌មាន Daily Mail បញ្ជាក់ ព្រឹត្តិការណ៍ដណ្តើមពាន World Cup ដែលប្រមូលផ្តុំដោយ Legend សេរ៊ីចាស់មកពីប្រទេសធំៗផ្សេងគ្នា នឹងធ្វើឡើងចាប់ពីខែមិថុនា ឆ្នាំ ២០២៤ តទៅ ក្នុងទឹកដីចក្រភពអង់គ្លេសធ្វើជាម្ចាស់ផ្ទះ។ វាក៏ចំល្បាក់កាលបរិច្ឆេទតែមួយ ក្រោយបិទរដូវកាលក្លឹបទូទាំងតំបន់អឺរ៉ុប តែនៅជម្រើសជាតិកំពុងពេញលេងពានធំ ២ មាន UEFA European Championship និង Copa America។
ប្រិយមិត្តប្រាកដជាឆ្ងល់ ហើយសួរថា តើក្រៅពីកត្តាអាយុ ចុះខាង EPG មានលក្ខខណ្ឌតម្រូវអ្វីផ្សេងទៀត ដើម្បីអនុញ្ញាតឲ្យកីឡាករបានចូលរួម? ចម្លើយគឺ ពួកគេកំណត់យកតែកីឡាករដែលធ្លាប់បានបង្ហាញខ្លួនឲ្យក្លឹប ឬ ជម្រើសជាតិច្រើនជាង ១០០ ប្រកួតប៉ុណ្ណោះ។
ជាលទ្ធផលយើងអាចរាប់បានត្រួសៗ តួយ៉ាងគឺអតីត Legend របស់ Liverpool/Real Madrid លោក Steve McManaman ដែលនឹងតំណាងឲ្យប្រធានក្រុមអង់គ្លេស អមដោយមិត្តចាស់ជាច្រើនផ្សេងទៀត ដូច Michael Owen, Ashley Cole, Joe Cole, Rio Ferdinand, David James, Frank Lampard និង Robbie Fowler ជាដើម។
ស្របពេលខាងប្រេស៊ីលអាចមានប្រធានក្រុម Emerson និងអ្នកឯទៀតដូច Kaka, Ronaldinho, Roberto Carlos និង Rivaldo ជាដើម។ ហើយបារាំងអាចជាដាក់ Christian Karembeu ជាប្រធានក្រុម ដែលអតីត Legend រូបនេះ ធ្លាប់មកកាន់ប្រទេសកម្ពុជានៅពាក់កណ្តាលឆ្នាំ ២០២២ បូកផ្សំនឹង Thierry Henry ក៏ដូចជា Marcel Desailly។ អ៊ីតាលីក៏មានជើងចាស់គ្នាយើងស្គាល់ច្រើន ដូច Fabio Cannavaro និង Francesco Totti ជាដើម។
ងាកទៅអាល្លឺម៉ង់ អាចគាស់ជើង Mesut Ozil និង Sami Khedira ត្រលប់មកវិញ ហើយអាហ្សង់ទីនមាន Hernan Crespo និង Pablo Zabaleta រួចយើងទៅមើលចុងក្រោយអេស្ប៉ាញអាចមាន David Villa និង Carles Puyol ឬអាចបន្ថែម Iker Casillas ថែមទៀតផង។
ចុងក្រោយច្បិចចូលច្បាប់នៃការប្រកួតបន្តិច ក៏មិនលេងពេញម៉ោងនោះដែរ ពោលត្រឹម ៧០ នាទី ហើយអនុញ្ញាតឲ្យមានការផ្លាស់ប្តូរសេរី។ កាលបរិច្ឆេទវគ្គ ៨ ក្រុមចុងក្រោយ នៅល្បាក់ថ្ងៃ ៤ និង ៥ មិថុនា ហើយ ៨ មិថុនា វគ្គ ៤ ក្រុម និងផ្តាច់ព្រ័ត្រ នៅក្រោយនោះ ៣ ថ្ងៃបន្ទាប់៕
ប្រភព៖ បរទេស