រឿងនេះមិនថ្មីទេ តែក៏មិនចាស់ពេកដែរសម្រាប់អ្នកគាំទ្រដែលឲ្យតម្លៃគ្រប់សកម្មភាពមនុស្សធម៌ចេញពីកីឡាករបាល់ទាត់កំពូល។ ជាការពិតដូចអ្នករាល់គ្នាបានដឹង តារាឆ្នើម Cristiano Ronaldo ចាប់តាំងប្រលូកក្នុងអាជីព សរុបលោកបានឈ្នះពានឯកត្តជន Ballon d’Or ចំនួន ៥ គ្រឿង ពោលក្នុងឆ្នាំ ២០០៨,១៣,១៤,១៦ និង ២០១៧។
ជាទូទៅតាមច្បាប់ទម្លាប់ពានដែលកីឡាករឈ្នះ គឺត្រូវប្រគល់ប្រភេទចម្លង Replica Version មួយ ទៅកាន់ក្លឹបដើម្បីតាំងទុកក្នុងសារមន្ទីរ។ មួយក្នុងចំណោមនោះ ពានទីពីរក្នុងឆ្នាំ ២០១៣ ដែលលោកទទួលបានគ្រាឈរជើងឲ្យក្លឹបអធិរាជស បែរមិនបានប្រគល់ជូនក្លឹបនោះទេ ផ្ទុយទៅវិញស្នើសុំក្នុងលក្ខខណ្ឌពិសេសនិងមានតម្លៃជាទីបំផុត គឺធ្វើការបរិច្ចាគទៅកាន់ការងារសប្បុរសធម៌។
បើតាមសារព័ត៌មាន Marca ធ្លាប់បានចុះផ្សាយ Ballon d’Or ១ ក្នុងចំណោម ៥ គ្រឿងរបស់ Ronaldo ត្រូវបានបាត់បង់ហើយ តែនេះបាត់ត្រឹមសំបកពានប៉ុណ្ណោះ ខណៈការកត់ត្រាទុកថា CR7 ឈ្នះ ៥ លើក គឺនៅរក្សាដដែល។ ពានមួយនោះបានដាក់ដេញថ្លៃ ទទួលបានប្រាក់ ៦០០ ០០០ អឺរ៉ូ ទិញយកពីម្ចាស់ថ្មីជាសេដ្ឋីអ៊ីស្រាអែលលោក Idan Ofer។ ម្ចាស់ថ្មីខាងលើ ធ្លាប់បានបង្ហោះរូបកាន់ពានជាមួយនឹងអតីតភ្នាក់ងាររត់ការកាន់ឆ្នាំលោក Jorge Mendes បន្ទាប់ជោគជ័យការដេញថ្លៃក្នុងទីក្រុងឡុង ចក្រភពអង់គ្លេស។
ទឹកប្រាក់ទាំងអំបាលម៉ាន ជាង ៦៥០ ០០០ ដុល្លារអាមេរិក ត្រូវបានបង្វែរទាំងស្រុងចូលទៅក្នុងមូលនិធិ Make-A-Wish ដែលជាកម្មវិធីសប្បុរសធម៌ជួយសង្រ្គោះជីវិតក្មេងៗខ្វះខាតរាប់ពាន់មុឺននាក់ទូទាំងសកលលោក កំពុងប្រឈមគ្រោះថ្នាក់ដោយសារជំងឺធ្ងន់ធ្ងរ។
កាយវិការដ៏គួរឲ្យគោរពនេះ ត្រូវបានអ្នកគាំទ្រពោលពាក្យសរសើរឥតដាច់ពីមាត់ ក៏រាប់បានអ្នកខ្លះធ្លាប់តែស្អប់ ធ្លាប់តែបន្តុះបង្អាប់ស្តេចបាល់ទាត់ព័រទុយហ្គាល់ ក៏ប្តូរមកវិញជាពាក្យគោរពស្រលាញ់ចំពោះទឹកចិត្តដែល Ronaldo មានចំពោះប្រជាជនខ្វះខាត។
ក្រៅតែពីពាន Ballon d’Or កន្លងមកក៏ធ្លាប់មានរបស់របរផ្សេងទៀតចេញពីបុរសវ័យ ៣៨ ឆ្នាំ ហៅបានជារបស់មានតម្លៃក្នុងការជួយជីវិតមនុស្ស គ្រាន់ឆ្លងកាត់ការទទួលយកនិងដាក់ដេញថ្លៃតាមរយៈបុគ្គលដទៃ។ ដូចករណីស្លាកដៃប្រធានក្រុមលោកបោះចោលលើទីលានប្រមូលលុយបានជាង ៧ មុឺនដុល្លារ ហើយមួយទៀតជាអាវកាលនៅ Juventus មានចុះហត្ថលេខាផ្ទាល់ខ្លួន ប្រគល់ឲ្យមិត្តរួមក្រុម Merih Demiral ក៏គេយកទៅលក់បន្តបានលុយ ១៥ ០០០ ដុល្លារ ជួយដល់ជនរងគ្រោះនៅគ្រោះរញ្ជួយដីកាលឆ្នាំ ២០២៣។
ចុងក្រោយបន្ថែមអំពីពាន Ballon d’Or បន្តិច ក្នុងប្រវត្តិសាស្រ្តបាល់ទាត់ក៏ធ្លាប់មានកីឡាករជើងចាស់ផ្សេងទៀតអនុវត្តសកម្មភាពលក់ពានដូចជា Ronaldo នោះក៏មិនឆ្ងាយពីសមាជិក Real Madrid គឺអតីតកីឡាករបាល់ទាត់លោក Alfredo di Stefano។
នៅឆ្នាំ ១៩៥៧ ពានដែលលោកបានឈ្នះក៏លក់បានក្នុងតម្លៃ ៦០ ៨០០ ផោន លុះពីរឆ្នាំក្រោយឈ្នះម្តងទៀតក៏លក់ចេញទៀតបានតម្លៃ ៥៤ ៤០០ ផោន ហើយដល់ថ្នាក់ពានមានតែមួយក្នុងលោក Super Ballon d’Or ក៏មានការប្រកាសលក់ដែរ បានដល់តម្លៃ ១៨៧ ៥០០ ផោន តែយ៉ាងណាលុយទាំងអស់មិនច្បាស់ថាយកទៅប្រើប្រាស់ក្នុងគោលដៅណាមួយឡើយ៕
ប្រភព៖ បរទេស