នៅបញ្ចប់រដូវកាល ២០២២/២៣ ខាងមុខ លើសតែពីការខកខានសម្រេចសមិទ្ធផលធំ ទៀតសោតអ្នកគាំទ្រក្លឹបហង្សក្រហម Liverpool ក៏ទទួលអារម្មណ៍សោកស្តាយមិនស្ទើរ ជុំវិញដំណើរចាកចេញនៃកីឡាករកាន់ឆ្នាំមួយចំនួន រួមទាំង Roberto Firmino ផងដែរ។ លើសតែពីគុណភាព ទេពកោសល្យលើទីលាន CTS Sports ក៏សូមកកាយ ស្រាយបង្ហាញរឿងរ៉ាវគួរឲ្យចាប់អារម្មណ៍ទាំង ៥ ទាក់ទិននឹងបុរសវ័យ ៣១ ឆ្នាំ សញ្ជាតិប្រេស៊ីល រួចក៏ជឿថា មានបងប្អូនយើងតិចណាស់ដែលធ្លាប់បានដឹង៖
៥) ជាបុរសស្មោះនឹងដៃគូស្នេហ៍
កីឡាករបាល់ទាត់ខ្លះ អាងខ្លួនសង្ហារ អាងរកលុយបានទាំងលាន ជាមួយទំនាក់ទំនងស្នេហាក៏ពួកគេដើរគាស់បេះដូងនារីៗរាប់ភ្លេច តែខុសអីពី Firmino បានប្រគល់ចិត្តជូននារីតែម្នាក់ក្នុងជីវិត អស់រយៈកាលជិត ១ ទសវត្សមកហើយ។
លើសតែពីស្មោះនឹងក្លឹប ខ្សែប្រយុទ្ធជំនាញបញ្ជូនបាល់ No Look ខាងលើ ក៏ស្មោះនឹងភរិយាផងដែរ ដ្បិតអីស្គាល់គ្នានៅឆ្នាំ ២០១៤ ហើយដល់ឆ្នាំ ២០១៧ ក៏សម្រេចរៀបអាពាហ៍ពិពាហ៍ រួចមកទល់បច្ចុប្បន្នមានកូនស្រី ២ រូបជាចំណងដៃ។ អំពីអត្តសញ្ញាណភរិយា អ្នកស្រី Larissa Pereira ត្រូវបានគេស្គាល់ជាតារាម៉ូដែលផូរផង់សញ្ជាតិប្រេស៊ីល ក៏ជាស្ថាបនិកយីហោហាងលក់សំលៀកបំពាក់ BeValen Store។
៤) ជាអ្នកនិយមដេញស៊េរីរថយន្តទំនើប
តារាឆ្នើមជំនាញជើងស្តាំ រកលុយបានពីបាល់ទាត់ ក៏យកមួយផ្នែកទៅដេញសេរ៊ីឡានមិនចេះតិចគ្រឿង ហើយត្រួសៗបណ្តុំ Collection រថយន្តរបស់ Firmino រួមមាន Porsche Panamera, Lamborghini Urus, Rolls Royce Phantom, Ferrari 458 Italia, Range Rover និង Porsche Cayenne នេះសុទ្ធតែសេរ៊ីឆ្នាំខ្ពស់ សរុបលុយចូលខ្ទង់រាប់លានដុល្លារ។
៣) ចេះនិយាយច្រើនភាសា
ការប្រើប្រាស់ភាសា ជាមធ្យោបាយប្រាស្រ័យទាក់ទងដ៏ចាំបាច់មួយសម្រាប់កីឡាករបាល់ទាត់ ហើយជាមួយ Firmino គឺមិនជាបញ្ហាអ្វីនោះឡើយ ដ្បិតអីគេអាចនិយាយដល់ទៅ ៣ ភាសា រួមមានព័រទុយហ្គាល់, អាល្លឺម៉ង់ និងអង់គ្លេស។
២) រឿងរ៉ាវនៅពីក្រោយធ្មេញសចែងចាំង
ស្បែកអូនសភ្លឺចាំងប៉ុណ្ណា ក៏ធានាថាមិនចាំងដល់ធ្មេញប្រុសសង្ហារ Firmino នោះដែរ។ តាមពិតទៅ ពីដំបូងឡើយ ក៏ដូចតែកីឡាករទូទៅ ដែលមានធ្មេញមិនសូវស្រស់ស្អាត តែទើបមកកែប្រែពេលក្រោយ ពោលពេលមកចូលរួមនៅ Liverpool ល្បាក់ ៨ ឆ្នាំមុន។
តាមការទម្លាយពីវេជ្ជបណ្ឌិតអ្នកធ្វើធ្មេញឲ្យ Firmino គឺលោក Robbie Hughes បានឲ្យដឹង៖ “Firmino គេថាចង់បានស្នាមញញឹមដែលមានភាពជឿជាក់ និងស្រស់ស្អាតបំផុតមួយ ហើយខ្ញុំឲ្យគេមើលបញ្ជីពណ៌ធ្មេញ ឧទាហរណ៍កម្រិតពណ៌សទី ១, ២, ៣,៤ ជាដើម តែគេអត់ព្រមជ្រើសយកទេ ហើយថាសុំកម្រិតពណ៌សលើសហ្នឹងទៀត ទើបយើងសម្រេចបង្កើតកម្រិតពណ៌សភ្លឺចាំងជាពិសេសដាច់គេមួយ សម្រាប់ Firmino តែម្នាក់គត់”។
១) នរណាជា idol ក្នុងដួងចិត្ត?
និយាយឥតលាក់បាំង Firmino លើកឡើង៖ “idol ក្នុងដួងចិត្តរបស់ខ្ញុំ គឺជា Ronaldinho Gaucho ដោយខ្ញុំចាប់ផ្តើមស្រលាញ់គាំទ្រគាត់ ពេលមើលឃើញគាត់បង្កើតនូវ Skill ប្លែកៗ ប្រៀបដូចជាការបង្ហាញវេទមន្ត នៅពេលលេងបាល់ទាត់ គាត់ក៏ជាបុគ្គលគំរូសម្រាប់ខ្ញុំដែរ”៕
ប្រភព៖ បរទេស