ក្រុមហង្សក្រហម Liverpool កាន់តែឃ្លាតពីតំបន់ Top4 មែនទែនហើយ ក្រោយពីលេងចាញ់ក្រុម Bournemouth ក្នុងលទ្ធផល ១-០ ក្នុងក្របខណ្ឌ English Premier League ។
កាលពីសប្ដាហ៍មុន Liverpool បានយកឈ្នះលើក្រុម Manchester United ដល់ទៅ ៧-០ ឯណោះ ប៉ុន្តែមកសប្ដាហ៍នេះវិញ ឃើញថាពួកគេបែរជាលេងចាញ់ក្រុម Bournemouth ទៅវិញ ក្នុងលទ្ធផល ១-០។ ក្នុងការប្រកួតនេះដែរ ក្រុមរបស់លោក Klopp បានប្រើប្រាស់កីឡាករពេញអស់ទៅហើយ ប៉ុន្តែនៅមិនអាចទទួលបានលទ្ធផលល្អដដែល។ ពួកគេមានឱកាសតាមស្មើបានដែរ ក្រោយពី Salah ទទួលបានបាល់ប៉េណាល់ទី ប៉ុន្តែគួរឱ្យសោកស្ដាយ រូបគេស៊ុតមិនចូលទៅវិញ។
មកដល់ពេលនេះ Liverpool ស្ថិតនៅលេខ៥ក្នុងតារាង Premier League ដោយមាន៤២ពិន្ទុ។ ស្របពេលក្រុមលេខ៤ Spurs វិញ មានដល់៤៨ពិន្ទុទៅហើយ។ ចំណាត់ថ្នាក់លេខ៥របស់ Liverpool ក៏នឹងប្រែប្រួលផងដែរ ប្រសិនបើ Newcastle United អាចឈ្នះ២ប្រកួតនៅក្នុងដៃរបស់គេទៀត នោះនឹងហក់មកកាន់លេខ៥ជំនួសវិញហើយ៕