លោក Graham Potter បានអះអាងថាសម្ពាធនៅលើស្មាមិនសូវជាធ្ងន់ដូចមុននោះទេ បន្ទាប់ពីក្រុម Chelsea ទទួលបានជ័យជម្នះ២ប្រកួតជាប់គ្នាមកនេះ។
២ប្រកួតចុងក្រោយនេះ ក្រុមតោខៀវ Chelsea បានយកឈ្នះលើក្រុម Leeds United និង Dortmund បានឱកាសឡើងទៅវគ្គ៨ក្រុមចុងក្រោយនៃពានរង្វាន់ UEFA Champions League ហើយ។ ជាមួយការធ្វើបានល្អនេះដែរ ក៏បានបន្ធួរសម្ពាធមកលើអ្នកចាត់ការក្រុម Potter ផងដែរ ត្បិតអីតាំងពីចូលកាន់តំណែងមក លោកដឹកនាំក្រុមមិនបានល្អនោះទេ បើទោះជាទិញកីឡាករថ្មីចូលយ៉ាងច្រើនក៏ដោយ។
ជាក់ស្ដែងនៅយប់នេះ ត្រូវប្រកួតជាមួយក្រុម Leciester City ទៀត លោក Potter បាននិយាយថា៖ “ខ្ញុំក៏ដូចអ្នកគាំទ្ររបស់យើងដែរ ដែលតែងតែសប្បាយចិត្តនៅពេលទទួលបានជ័យជម្នះ។ ជ័យជម្នះ២ប្រកួត វាងាយស្រួលបន្ដិចហើយសម្រាប់យើង ប៉ុន្តែយើងក៏មិនត្រូវសប្បាយខ្លាំងពេកដែរ ព្រោះការប្រកួតនៅមានច្រើនទៀត។ តែយ៉ាងណា វាក៏បានបន្ថយសម្ពាធសម្រាប់យើងផងដែរ”៕