ក្រុមអ្នកមានបុណ្យ FC Barcelona ត្រូវបានចោទប្រកាន់ពីបទពុករលួយជុំវិញការបង់ប្រាក់ប្រមាណ ៧,៤លានផោនទៅឱ្យអតីតអនុប្រធានគណៈកម្មាធិការអាជ្ញាកណ្ដាល Jose Maria Enriquez Negreira។
រដ្ឋអាជ្ញាសាធារណៈរបស់ប្រទេសអេស្ប៉ាញបានចោទប្រកាន់ក្លឹបថាបានសូកទៅមន្ត្រីអាជ្ញាកណ្ដាលខាងលើដើម្បីឱ្យជួយដល់ក្លឹប FC Barcelona នៅពេលប្រកួតម្ដងៗ ឬនិយាយឱ្យចំទៅគឺឱ្យជួយកាន់ជើងខាង Barcelona នៅពេលប្រកួត។ ដោយប្រាក់ដែលសូកនោះ មានប្រមាណជា ៧,៤លានផោនឯណោះទៅឱ្យលោក Jose Maria និងក្រុមការងាររបស់លោកទាំងអស់ក្នុងជួរអាជ្ញាកណ្ដាល។
ដោយចរន្ដប្រាក់ដែលក្រុម Barcelona បង់នោះគឺផ្ទេរទៅក្រុមហ៊ុន២ផ្សេងទៀតដែលជាក្រុមហ៊ុនផ្ទាល់របស់លោក Jose Maria Enriquez Negreira ផ្ទាល់តែម្ដង។ ការធ្វើបែបនេះ គឺដើម្បីគេចពីការចាប់បានភ្លាមរបស់ក្រុមអ្នកសើបអង្កេត។ ដោយរឿងនេះ កើតមានឡើងតាំងពីជំនាន់ប្រធានក្លឹបចាស់លោក Josep Maria Bartomeu មកម្ល៉េះ។
យ៉ាងណាមិញ លោក Joan Laporta ដែលជាប្រធានក្លឹបបច្ចុប្បន្នក៏បានអះអាងកាលពីសប្ដាហ៍មុនដែរថាក្រុម Barcelona មិនដែលទិញអាជ្ញាកណ្ដាលនោះទេ ឬជាប់ពាក់ព័ន្ធករណីសូកប៉ាន់អ្វីឡើយ។ លោកច្បាស់លាស់ថាក្លឹបមិនដែលធ្វើរឿងអាក្រក់បែបនេះទេ៕