កីឡាករជម្រើសជាតិគុនខ្មែររបស់កម្ពុជា ព្រំ សំណាង បាននិយាយថា បើទោះខ្លួនទទួលបានផ្លែផ្កាល្អនៅកម្មវិធីថៃហ្វៃ ចំនួនពីរលើកកន្លងមកក្ដីក៏ខ្លួនមិនដែលភ្លេចខ្លួនរឿងដណ្ដើមមេដាយជូនជាតិនាព្រឹត្តិការណ៍ស៊ីហ្គេមនៅកម្ពុជានោះដែរ។
កីឡាករមានដើមកំណើតមកពីខេត្តកំពង់ស្ពឺ នឹងចូលរួមការប្រកួតលើវិញ្ញាសាគុនខ្មែរក្នុងប្រភេទទម្ងន់៨១គីឡូក្រាមក្នុងព្រឹត្តិការណ៍ស៊ីហ្គេមឆ្នាំ២០២៣។ ក្រៅពីការហ្វឹកហាត់ក្នុងជំរុំជម្រើសជាតិកីឡាករខាងលើក៏បានចេញទៅប្រកួតក្នុងកម្មវិធីថៃហ្វៃ បានចំនួនពីរលើកផងដែរ ដោយក្នុងនោះគេទទួលបានជ័យជម្នះទាំងពីរលើក ហើយថែមទាំងផ្ដួលដៃគូឲ្យសន្លប់តាមរយៈជង្គង់ត្រឹមទឹកទី១ដូចគ្នាទៀតផង។
កីឡាករដដែលខាងលើបានប្រាប់មកកាន់ CAMBODIA 2023 យ៉ាងដូច្នេះថា «និយាយរឿងត្រៀមខ្លួនស៊ីហ្គេមខ្ញុំមិនដែលភ្លេចទេបងខ្ញុំប្រឹងប្រែងហ្វឹកហាត់មករហូតតាំងពីបញ្ចប់ស៊ីហ្គេមនៅវៀតណាមមក។ ចំពោះគោលដៅរបស់ខ្ញុំគឺយកឲ្យបានមេដាយមាសជូនជាតិបងសម្រាប់ស៊ីហ្គេមហ្នឹង។ ខ្ញុំដឹងថាដឹងតែបានមេដាយគ្រាន់តែមិនច្បាស់១០០%ថា នឹងបានមេដាយកម្រិតណា ប៉ុន្តែបើគោលដៅនិងមហិច្ឆតារបស់ខ្ញុំគឺមេដាយមាសហ្នឹងតែម្ដង»។
ព្រំ សំណាង បានបន្ថែមទៀតជាចុងក្រោយថា « ស៊ីហ្គេមនៅវៀតណាមជារឿងដែលខ្ញុំចងចាំមិនភ្លេចគឺការមើលស្រាលឧបករណ៍ហ្វឹកហាត់។ កាលហ្នឹងខ្ញុំគិតថា ហាត់មិនបាច់ពាក់ឧបករណ៍ក៏បានឲ្យតែប្រឹងហាត់ទៅបានហើយ មានអីដល់ពេលឡើងទៅវ៉ៃពាក់ឧបករណ៍គេហ្នឹងទៅបានដឹងថា វាពិបាកវាយ។ ចំណែកលើកនេះវិញខ្ញុំប្ដេជ្ញាហើយថា នឹងធ្វើឲ្យបានល្អមិនឲ្យដូចមុនទេ»។
គួររម្លឹកថា កាលស៊ីហ្គេមនៅប្រទេសវៀតណាម កីឡាករ ព្រំ សំណាង បានចូលរួមប្រកួតលើប្រភេទកីឡា Muay Thai ក្នុងប្រភេទទម្ងន់៨១គីឡូក្រាម ដោយកាលនោះគេដណ្ដើមបានមេដាយសំរឹទ្ធមួយគ្រឿងជូនជាតិផងដែរ៕