ជាញឹកញយលើទីលាននៅការប្រកួត តែងកើតមានគ្រាប់បាល់ កើតមានលទ្ធផលអភិនិហា រឿងដ៏មិនគួរឲ្យជឿ ជាច្រើនរាប់ភ្លេច ដោយឡែកក្នុងអត្ថបទនេះ CTS Sports សូមបង្វែរមកជ្រុងមួយ ពាក់ព័ន្ធនឹងជីវិតក្រៅទីលានរបស់កីឡាករបាល់ទាត់កំពូល ក៏ល្មមនឹងអាចឲ្យអ្នករាល់គ្នាព្រឺសម្បុរ ហើយខ្លះរវល់គិតថា វាជារឿងប្រឌិត តែបើមើលឲ្យជាក់ នោះគឺជារឿងពិតមែន។
តើអ្នកដឹងទេថា គម្លាតចំនួនថ្ងៃនៃអាយុរបស់ Cristiano Ronaldo ធៀបនឹង Lionel Messi ស្មើនឹងតួលេខតែមួយ ជាមួយនឹងអាយុរបស់កូនប្រុសច្បងអ្នកទាំងពីរ គឺ Cristiano Jr និង Thiago Messi?
ប្រិយមិត្តបានដឹងហើយ តារាឆ្នើមសញ្ជាតិព័រទុយហ្គាល់បានកើតនៅថ្ងៃទី ០៥ កុម្ភៈ ឆ្នាំ ១៩៨៥ ស្របពេលដែលម្ចាស់ជើងឯក World Cup សញ្ជាតិអាហ្សង់ទីន កើតនៅថ្ងៃទី ២៤ មិថុនា ឆ្នាំ ១៩៨៧។ បើយើងធ្វើការរាប់គម្លាតនៃចំនួនថ្ងៃកំណើតរបស់ Ronaldo មកកាន់ថ្ងៃកើតរបស់ Messi យើងឃើញថា មានចំនួន ៨៦៩ ថ្ងៃ។
ឥឡូវយើងងាកទៅមើលថ្ងៃកំណើតនៃកូនច្បងរបស់ CR7 វិញម្តង គឺ Cristiano Jr បានកើតនៅថ្ងៃទី ១៧ មិថុនា ឆ្នាំ ២០១០ ហើយគេក៏មានអាយុបង ឬគម្លាតធៀបនឹងថ្ងៃកំណើតនៃកូនច្បងរបស់ M10 គឺ Thiago Messi ចំនួន ៨៦៩ ថ្ងៃ ដូចជាគម្លាតនៃឪពុកពួកគេទាំងពីរដូចគ្នា។ សម្រាប់កូនដំបូងរបស់ Messi និង Antonela Roccuzoo គឺបានចាប់កំណើតឃើញភពផែនដីនៅថ្ងៃទី ០២ វិច្ឆិកា ឆ្នាំ ២០១២។
ពុំមាននរណាអាចបកស្រាយបានឡើយ ថានេះជាភាពចៃដន្យ ឬជាការរៀបចំទុករបស់ទេវតា ដ្បិតតែមកក្នុងពិភពបាល់ទាត់ Messi និង Ronaldo ក៏ជា GOAT ដែលតែងមានការប្រកួតប្រជែងគ្នាឥតឈប់អស់កាលជាច្រើនឆ្នាំ។ យ៉ាងណាក៏មានមតិលើបណ្តាញសង្គម ដែលនិយាយបែបលេងសើចថារឿងនេះ ដោយសារតែនៅពីក្រោយការប្រជែងលើទីលាន Ronaldo/Messi គឺជាមិត្តល្អនឹងគ្នា ហើយបានណាត់កំណត់យកថ្ងៃពិសេសមួយ សម្រាប់កំណើតនៃកូនច្បង ឲ្យកើតជាការចងចាំរហូតតទៅមុខ។
ដោយឡែកយើងបង្វែរទៅខ្សែប្រយុទ្ធបារាំង Antoine Griezmann រឿងរ៉ាវកូនប្រុសស្រីទាំង ៣ របស់គេ ក៏មានភាពចៃដន្យថែមទៀត ដ្បិតថ្ងៃកំណើត កើតចំថ្ងៃតែមួយខែតែមួយ គ្រាន់ខុសឆ្នាំ។ អាចថា នេះជាកីឡាករបាល់ទាត់តែមួយរូបគត់ក្នុងលោក ដែលមានកូនៗទាំង ៣ កើតនៅថ្ងៃខែតែមួយ ដូច៖
- កូនដំបូង Amario Griezmann កើតនៅថ្ងៃទី ០៨ មេសា ឆ្នាំ ២០១៦
- កូនទីពីរ Mia Girezmann កើតនៅថ្ងៃទី ០៨ មេសា ឆ្នាំ ២០១៩
- កូនទីបី Alba Griezmann កើតនៅថ្ងៃទី ០៨ មេសា ឆ្នាំ ២០២១
ជុំវិញរឿងរ៉ាវនេះ ត្រូវបានគេយកមកចែកចាយជាថ្មី ហើយកើតការចាប់អារម្មណ៍ និងមានការបញ្ចេញមតិផ្សេងៗពីគ្នាលើបណ្តាញសង្គម។ ត្រង់មតិអស់សំណើចមួយ បានសរសេរថា៖ “មិនត្រឹមតែអាចរកបានគ្រាប់បាល់ Hat-trick លើទីលាន ទាំងក្រៅទីលានក៏ Griezmann លៃលកបានយ៉ាងស្អាតដែរ”។ មតិផ្សេងទៀតថា៖ “បានកូនកើតចំថ្ងៃតែមួយអ៊ីចឹងម្យ៉ាងដែរ មួយឆ្នាំធ្វើខួបជុំគ្នាតែម្តង អត់ចាំបាច់ចំណាយលុយច្រើន ជប់លៀងម្តង ជុំបានកូនទាំង ៣”៕
ប្រភព៖ បរទេស