ជោគជ័យរបស់ Manchester United នៅពេលចុងក្រោយ មួយរយៈមុនបងប្អូនយើងច្រើនតែនឹកដល់ឈ្មោះ Marcus Rashford ដែលរកបានគ្រាប់បាល់សឹងគ្រប់ការប្រកួត ដល់តែឥឡូវនៅថ្ងៃខ្លះដែលកីឡាករវ័យក្មេងខកខានការរកគ្រាប់បាល់ ក៏បែរជាផ្លាស់មកកីឡាករចាស់វស្សា Casemiro ឯណេះ កើតជាតួឯកទៅវិញ។
ជាក់ស្តែងដូចកាលពីយប់មិញ ដែលបិសាចក្រហមបានយកឈ្នះទៅលើក្លឹប Reading នៅលទ្ធផល ៣-១ នាជុំទី ៤ ពានរង្វាន់ FA Cup គឺកើតមានចំណែកគ្រាប់បាល់របស់អតីតកីឡាករក្លឹប Real Madrid ដល់ទៅពីរគ្រាប់ ហើយចាប់អារម្មណ៍បំផុតគឺត្រង់គ្រាប់បាល់ទីពីរ អាចស៊ុតបន្តក់ចូលទីពីក្រៅប្រអប់មិនគួរឲ្យជឿ។
តាមពិតទៅទាំង ៣ គ្រាប់នៃជ័យជម្នះរបស់ក្រុមដឹកនាំដោយលោក Erik ten Hag គឺសុទ្ធសឹងកើតចេញពីបំណែកសហការទាំងការ Assist ការរកគ្រាប់បាល់ពីថ្វីជើងកីឡាករសញ្ជាតិប្រេស៊ីលទាំងស្រុង។ ដូចគ្រាប់បាល់ដំបូង ជាការ Assist របស់ Antony មកឲ្យ Casemiro ដែលសំដៅរត់ចោះចូលប្រអប់ ឆ្កឹះបាល់ផុតដៃអ្នកចាំទី នៅនាទី ៥៤ មុនរំលង ៤ នាទីបន្ទាប់ Fred ប៉ះបាល់ខ្លីទម្លាក់ពេញជើង Casemiro ស៊ុតកាច់ចង្កេះ ដូចគេចាប់ដាក់នៅរយៈចម្ងាយជាង ២៧ ម៉ែត្រ ស្រែកហ៊ោរង្គើពេញកីឡដ្ឋាន Old Trafford។ ចូលដល់គ្រាប់បាល់ទីបី ជាការលេង ១០ នាក់របស់ Reading ទល់ ១១ នាក់ ពេលនោះ Bruno Fernandes បានកាត់បាល់ត្រង់ចេញពីតំបន់ស្លាប មកចូលប្រអប់ នាំឲ្យកើតឱកាសដល់កីឡាករប្រេស៊ីល Fred ចេញក្បាច់ខ្វែងជើងថើរបាល់ចូលទីយ៉ាងធូរ។
យ៉ាងណាក្រោយចប់ការប្រកួត Casemiro ត្រូវបានអ្នកគាំទ្រ និងអ្នកវិភាគបានកោតសរសើរមិនដាច់ពីមាត់ ដោយថាកីឡាករវ័យ ៣០ ឆ្នាំ គឺជាការចុះហត្ថលេខាដ៏ល្អដាច់គេប្រចាំរដូវកាលនេះ ហើយក៏រាប់បានជាខ្សែបម្រើការពារល្អបំផុតក្នុងលោកនៅពេលបច្ចុប្បន្នផងដែរ។ បានទាំងការពារ ដណ្តើមយកបាល់ក៏អែម ស្លាយយកបាល់ពោរពេញដោយបច្ចេកទេស ជារួមចេះមួយចប់ ទាំងការបញ្ជូនបាល់ Assist និងការបញ្ចប់ទី មិនថាជិតឆ្ងាយក្តី។
ងាកទៅការយល់ឃើញរបស់អតីតជើងចាស់ក្លឹប Arsenal លោក Ian Wright បានសរសើរកីឡាករប្រេស៊ីលមិនដាច់ពីមាត់បែបនេះថា៖ “វាជាការបញ្ចប់ទីដ៏ល្អមួយ ត្រឹមតែគ្រាប់បាល់នោះ គឺសមល្មមនឹងផ្តល់ឲ្យគេនូវពាន Man of the Match បានហើយ ព្រោះការដែលចេះរត់ចូលទៅក្នុងចន្លោះ តាមរយៈការបញ្ជូនចេញពី Antony វាគឺជាគ្រាប់បាល់គុណភាពយ៉ាងពិតប្រាកដ ហើយនេះការលេងមួយប៉ះពីរប៉ះ ពិតជាធ្វើឲ្យក្លឹប Reading មានការស្មុគស្មាញជាខ្លាំង”។
រំឭកថា ស្ថិតិបង្ហាញខ្លួន Casemiro ២៧ ប្រកួត ក៏រកបាន ២ គ្រាប់និង Assist ៥ លើក ក៏កំពុងឈរលើក្តីសង្ឃឹមអាចលើកពាន ក្រោយ United ខកខានអស់រយៈកាល ៦ ឆ្នាំ។ នៅរដូវកាលនេះ បិសាចក្រហមជាក្លឹបអង់គ្លេសតែមួយគត់ ដែលនៅសេសសល់ឱកាសលើកពានរង្វាន់ ៤ រួមមាន Premier League ដែលកំពុងឈរចំណាត់ថ្នាក់ទី ៤, FA Cup ឈានមកដល់ជុំទី ៥, EFL Cup ឈានមកដល់វគ្គពាក់កណ្តាលផ្តាច់ព្រ័ត្រ និង UEFA Europa League ឆ្លងដល់ការប្រកួត Knockout ដណ្តើមកៅអីវគ្គ ១៦ ក្រុម ទល់ Barcelona នាខែក្រោយ៕
ប្រភព៖ បរទេស