កីឡាករប្រដាល់សកលកម្ពុជា រ៉ាចាពៅ អាប់ឌុលឡា បានសាងប្រវត្តិសាស្ត្រថ្មីមួយហើយសម្រាប់កម្ពុជា ក្រោយពីឡើងទៅវគ្គផ្ដាច់ព្រ័ត្រជើងឯកទ្វីអាស៊ីASBC Asian U22 Men &Women Boxing Championship 2023 នៅប្រទេសថៃ។
កំណត់ត្រានេះកើតឡើងក្រោយរូបគេឈ្នះកីឡាករកៀហ្ស៊ីស៊ីស្ថាន ក្នុងវគ្គពាក់កណ្តាលផ្តាច់ព្រ័ត្រ នៅប្រទេសថៃ នៅថ្ងៃចន្ទ ទី២៣ ខែមករា ឆ្នាំ២០២៣នេះ។ នេះជាជោគជ័យ និងកំណត់ត្រាប្រវត្តិសាស្រ្តថ្មីសម្រាប់សហព័ន្ធក្នុងការឈានឆ្ពោះទៅរៀបចំការប្រកួតកីឡាស៊ីហ្គេម ឆ្នាំ២០២៣ នាខែឧសភា ខាងមុខនេះ។
សហព័ន្ធកីឡាប្រដាល់សកលកម្ពុជាបានបញ្ជូនប្រតិភូគ្រូបង្វឹក និងកីឡាករកីឡាការិនី ៦រូបចូលរួមប្រកួតកីឡាប្រដាល់សកលជ្រើសរើសជើងឯកអាស៊ីអាគ្នេយ៍ យុវជនអាយុក្រោម២២ឆ្នាំ ASBC Asian U22 Men &Women Boxing Championship 2023 នៅប្រទេសថៃ។ កម្ពុជា ទទួលបានមេដាយសំរឹទ្ធមួយហើយ ដោយកីឡាករ ពេញ វណ្ណថង បន្ទាប់ពីចាញ់កីឡាករកាហ្សាក់ស្ថានក្នុងវគ្គពាក់កណ្តាល់ផ្តាច់ព្រ័ត្រ៕