“រលកក្រោយរុញច្រានរលកមុខ” គឺជាច្បាប់ធម្មជាតិ ដែលតែងតែកើតឡើងឥតគេចផុត ហើយវាក៏កំពុងសាយភាយទៅលើក្លឹប Real Madrid នៅតំបន់ប្រយុទ្ធជាពិសេសផងដែរ បើរាប់ការចាកចេញម្តងមួយៗ ពោលតាំងពីជំនាន់ Cristiano Ronaldo នៅឆ្នាំ ២០១៨។
ដំណើរចែកផ្លូវរបស់កីឡាករព័រទុយហ្គាល់ ជាអតីតខ្សែប្រយុទ្ធស្លាបឆ្វេង និង Gareth Bale ជាប្រយុទ្ធស្លាបស្តាំដ៏ប៉ិនប្រសព្វ ល្បីល្បាញខ្លាំងនៅសម័យកាល “BBC” ឥឡូវហាក់ត្រូវបានគេបំភ្លេចចោលបាត់ទៅហើយ បន្ទាប់ពីក្លឹបរកបានអ្នកថ្មី ល្អទាំងវ័យ ល្អទាំងគុណភាព នោះគឺ Vinicius Junior និង Rodrygo។
យ៉ាងណាពេលវេលាទៅមុខ ការឈរជើងរបស់ Karim Benzema មួយរូបចុងក្រោយ នៅប្រយុទ្ធប្រអប់ ក៏មិនជាគង់វង្សយូរទៀតនោះដែរ ម្ល៉េះក្លឹបក៏សម្រេចដាក់គោលដៅជាបណ្តើរៗ ហើយកន្លងទៅថ្មីថ្មោងទើបតែជោគជ័យយកបានយុវជនឆ្នើម Endrick Felipe របស់ក្លឹបប្រេស៊ីល Palmeiras។
បើតាមរបាយការណ៍ចុះផ្សាយពីប្រភពគួរឲ្យទុកចិត្តដូច ESPN និង Fabrizio Romano បានឲ្យដឹងថា ដំណើរការចរចារវាងភាគីក្លឹប Real Madrid និង Palmeiras គឺឈានដល់ការសម្រេច ១០០ ភាគរយហើយ នៅឡើយចាំតែរត់ឯកសារផ្លូវច្បាប់ ឲ្យស្របទៅតាមគោលការណ៍កំណត់របស់ FIFA តែប៉ុណ្ណោះ។
តម្លៃផ្តាច់កុងត្រាដែលក្លឹបអាណាព្យាបាល ព្រមលក់ចេញ Endrick គឺ ៦០ លានអឺរ៉ូ តែដោយសារក្លឹបអធិរាជស ចង់ប្រជែងយកឈ្នះលឿនៗទៅលើក្លឹប Chelsea និង Paris Saint-Germain ម្ល៉េះហើយក៏សម្រេចបុកលុយបន្ថែម ១២ លានអឺរ៉ូផ្សេងទៀត បើគិតទាំងប្រាក់បង់ពន្ធ ដើម្បីបិទបញ្ចប់ដំណើរការចរចាតែម្តង។
ស្ថិតនៅអាយុ ១៦ ឆ្នាំ ការដែលត្រូវទៅក្លឹបនៅក្រៅប្រទេសកំណើត គឺទាមទារការរត់ឯកសារជាមួយលក្ខខណ្ឌតឹងរ៉ឹងជាច្រើនហូរហែ ទើបជាហេតុនាំឲ្យដំណឹងផ្លូវការ មិនទាន់អាចត្រូវបានប្រកាសនាពេលវេលាឥឡូវនេះ ហើយអាចរង់ចាំដល់ក្រោយចប់ World Cup ក៏ថាបាន។
ខ្សែប្រយុទ្ធប្រអប់ ជាប់រហស្សនាម “Pele” ជំនាន់ថ្មី នឹងត្រូវមកបង្ហាញខ្លួនលើទីលានឲ្យ Real Madrid នៅពេលគេគ្រប់អាយុ ១៨ ឆ្នាំ ឬកំឡុងឆ្នាំ ២០២៤ ជាមួយសុពលភាពកុងត្រារយៈពេល ៥ ឆ្នាំតទៅមុខ។ គួរឲ្យដឹងដែរថា Endrick ឡើងកូដ មានគេទទួលស្គាល់ត្រឹមមួយរំពេច ដ្បិតទើបបង្ហាញខ្លួននៅឈុតធំឲ្យ Palmeiras កាលពីថ្ងៃទី ៦ តុលា តែក៏មានចំណែករកគ្រាប់បាល់ ដល់ក្លាយជាអ្នកស៊ុតវ័យក្មេងបំផុត ជួយក្លឹបឈ្នះពានលីគកំពូល Serie A របស់ប្រេស៊ីល។
ជារួមមកនេះយើងអាចសម្រេចបានថា យ៉ាងយូរ ២ ឆ្នាំទៅមុខទៀត គីបហ្សីនតំបន់ប្រយុទ្ធរជ្ជកាលថ្មីរបស់ Real Madrid ក៏នឹងរំលេចឡើង ហើយសុទ្ធសឹងជាកីឡាករមានសញ្ជាតិប្រេស៊ីល ដូច Rodrygo លេងស្លាបស្តាំ Vinicius លេងស្លាបឆ្វេង ហើយ Endrick លេងប្រយុទ្ធកណ្តាល ដូចគ្នាពួកគេក៏នឹងអាចក្លាយជា Trio តំបន់ប្រយុទ្ធឲ្យជម្រើសជាតិ នៅ World Cup ២០២៦ ក៏ថាបាន៕
ប្រភព៖ បរទេស