Joao Felix, Pepe និង Goncalo Ramos មានបំណងចង់បកស្រាយដ៏សមស្រប់មួយទៅដល់អ្នកគាំទ្រចំពោះអវត្តមានរបស់ Cristiano Ronaldo និងទម្រង់លេងដ៏អស្ចារ្យរបស់ព័រទុយហ្គាល់ក្នុងវគ្គ ១៦ក្រុមចុងក្រោយនៃ World Cup។
Ronaldo ត្រូវបានគ្រូបង្វឹក Fernando Santos ដាក់ឲនៅកៅអីបម្រុងក្នុងការប៉ះគ្នាជាមួយនឹងប្រទេសស្វីសបន្ទាប់ពីមានការមិនពេញចិត្តអំឡុងពេលប្តូរចេញនៃការចាញ់កូរ៉េក្នុងការប្រកួតបិទពូល។
Ramos វ័យ ២១ឆ្នាំបានចូលលេង និងស៊ុតបញ្ចូលទីបានបីគ្រាប់ក្នុងការប្រកួត World Cup លើកដំបូងរបស់គាត់ក្នុងជ័យជម្នះ ៦-១ ដែលហាក់ដូចជាបង្ហាញថាព័រទុយហ្គាល់លែងពឹងផ្អែកលើអ្នកស៊ុតបញ្ចូលទីច្រើនជាងគេគ្រប់ពេលរបស់ពួកគេទៀតហើយ។ Ramos ខ្លួនឯងគឺជាមនុស្សដំបូងគេដែលនិយាយពី Ronaldo បន្ទាប់ពីការប្រកួតដោយបានលើកឡើងថា៖
“គាត់ជាប្រធានក្រុម គាត់គឺជាអ្នកដឹកនាំ ហើយយើងតែងតែទន្ទឹងរង់ចាំការលេងនៅក្បែរគាត់”។អវត្ដមានរបស់កីឡាករ Ronaldo ធ្វើឲ្យកីឡាករម្នាក់ទៀតនោះគឺ Felix ដែលចេញមកបញ្ចេញយោបល់អំពី Ronaldo ថា៖
“វាគឺជាការប្រកួតដ៏អស្ចារ្យមួយសម្រាប់ក្រុមទាំងមូល។ យើងចាប់ផ្តើមបានល្អតាំងពីនាទីដំបូង។ យើងបានលេងការប្រកួតពេញលេញ ហើយពេលវាដូចជាវាពិបាកសម្រាប់ក្រុមគូប្រជែងដែលចង់យកឈ្នះយើង។ មិនថា Cristiano នៅទីនោះឬអត់នោះទេ រឿងសំខាន់គឺក្រុម។ ក្រុមក៏លេងបានល្អដែរនៅពេល Ronaldo នៅលើទីលាន”។
ខ្សែការពារជើងចាស់ Pepe បានយល់ស្រប ហើយគាត់បានបញ្ឈប់រាល់ពាក្យចចាមអារ៉ាមដែលថា Ronaldo កំពុងតែខឹងសម្បារចំពោះការសម្រេចចិត្តដាក់គាត់នៅកៅអីបម្រុង។ Pepe បាននិយាយថា៖“គាត់ដឹងយ៉ាងច្បាស់ថាអ្វីដែលសំខាន់បំផុតគឺ “ពួកយើងទាំងអស់គ្នា”។ អ្វីដែលបានកើតឡើងថ្ងៃនេះគឺជាជម្រើសរបស់គ្រូបង្វឹក ហើយយើងត្រូវតែគោរពការសម្រេចចិត្តនេះ”៕
ប្រភព៖ Fotmob