វីរបុរសក្រុម Manchester United លោក Rio Ferdinand ជឿជាក់ថា ប្រេស៊ីលគឺជាក្រុមតែមួយគត់ដែលអាចបញ្ឈប់ក្រុមអង់គ្លេសនៅ World Cup ២០២២។
អង់គ្លេសបានយកឈ្នះទាំងវេលស៍ និងអ៊ីរ៉ង់ ហើយបានស្មើជាមួយអាមេរិក ដើម្បីបញ្ចប់ចំណាត់ថ្នាក់កំពូលនៃពូល B និងបានរក្សាកៅអីក្នុងវគ្គជម្រុះ World Cup។
Jordan Henderson បានបំបែកភាពជាប់គាំងសម្រាប់ក្រុមអង់គ្លេសក្នុងការប្រកួតវគ្គ ១៦ក្រុមចុងក្រោយរបស់ពួកគេជាមួយនឹងសេណេហ្គាល់ មុនពេលដែលប្រធានក្រុម Harry Kane រកបានគ្រាប់បាល់នាំមុខពីរគ្រាប់នៅតង់ទីមួយ។
តារាឆ្នើមរបស់ Arsenal កីឡាករ Bukayo Saka បានកប់គ្រាប់ទី៣ របស់អង់គ្លេសក្នុងតង់ទីពីរ ដើម្បីធានាដល់ក្រុមរបស់លោក Gareth Southgate ឈានដល់វគ្គ ៨ក្រុមចុងក្រោយ។ 
អង់គ្លេសនឹងត្រូវប៉ះក្រុមការពារតំណែងជើងឯក World Cup បារាំងក្នុងការប្រកួតវគ្គ៨ក្រុមចុងក្រោយនៅកីឡដ្ឋាន Al-Bayt នៅថ្ងៃទី១០ ខែធ្នូ។
អតីតខ្សែការពាររបស់ United បាននិយាយថា ប្រេស៊ីលគឺជាក្រុមតែមួយគត់នៅ World Cup ដែលអាចប្រកួតប្រជែងតទល់ជាមួយអង់គ្លេស។
Ferdinand បាននិយាយថា៖
“ខ្ញុំបានមើលបារាំងលេងទល់នឹងប៉ូឡូញមុនពេលការប្រកួតអង់គ្លេស។ ដោយបានមើលការប្រកួតនោះ ខ្ញុំមិនមានការភ័យខ្លាចជម្រើសជាតិបារាំងនោះទេ។ ការភ័យខ្លាចរបស់អង់គ្លេសមានតែមួយគត់គឺ Kylian Mbappe។
ពួកគេមិនបានបង្ហាញអ្វីអស្ចារ្យឲ្យខ្ញុំឃើញនោះទេកាលពីម្សិលមិញ ពួកគេពឹងលើកីឡាករតែម្នាក់ទេ។ ប្រសិនបើអាចរារាំង Mbappe បាននោះ ខ្ញុំមិនឃើញថាវាជាបញ្ហាសម្រាប់អង់គ្លេសលេងទល់នឹងបារាំងនោះទេ” ៕
ប្រភព៖ Sportbible