លោក Paulo Bento គ្រូបង្វឹកក្រុមកូរ៉េខាងត្បូង បានប្រកាសពីការលាឈប់ពីតំណែងរបស់ខ្លួនហើយ ក្រោយពីក្រុមបរាជ័យក្រោមថ្វីជើងក្រុមប្រេស៊ីលក្នុងលទ្ធផល ៤-១ ។
ជារឿងគួរឱ្យភ្ញាក់ផ្អើលមួយសម្រាប់អ្នកគាំទ្រ ដែលក្រុមកូរ៉េខាងត្បូងរបូតគ្រាប់បាល់ដល់ទៅ៤គ្រាប់ឯណោះនៅតង់ទី១។ ការរបូតច្រើនគ្រាប់នេះហើយ ធ្វើឱ្យកូរ៉េមិនអាចវាយបកទៅលើក្រុមប្រេស៊ីលបានវិញនោះទេ ពោលគឺនៅតង់ទី២ ពួកគេអាចរកបានត្រឹម១គ្រាប់វិញប៉ុណ្ណោះ ដើម្បីបញ្ចប់ការប្រកួតចាញ់ក្រុមលេខ១លើលោកប្រេស៊ីល ក្នុងលទ្ធផល ៤-១។
ក្រោយពីចប់ការប្រកួតភ្លាម លោក Paulo Bento គ្រូបង្វឹកក្រុមកូរ៉េខាងត្បូងបាននិយាយថា៖ “ខ្ញុំទើបតែប្រកាសប្រាប់ទៅកីឡាករ និងថ្នាក់ដឹកនាំកូរ៉េ ហើយនេះជាការសម្រេចចិត្តរបស់ខ្ញុំដែលធ្វើឡើងតាំងពីខែកញ្ញាមកម្ល៉េះ។ នៅថ្ងៃនេះ ខ្ញុំអាចប្រាប់ទៅអ្នករាល់គ្នាបានហើយពីការចាកចេញរបស់ខ្ញុំ ហើយខ្ញុំក៏អរគុណដល់គ្រប់គ្នាដែលបានគាំទ្រកន្លងមកផងដែរ។ កីឡាករទាំងអស់ពិតជាប្រឹងប្រែងនិងផ្ដល់គ្រប់យ៉ាងដល់ក្រុមទាំងមូល ខ្ញុំពិតជាមានមោទកភាពណាស់ក្នុងការដឹកនាំពួកគេ”៕