លោក Paulo Bento គ្រូបង្វឹកក្រុមជម្រើសជាតិកូរ៉េខាងត្បូង ថាមិនមានសម្ពាធអ្វីកើតឡើងនោះទេ ក្នុងការប្រកួតទល់ក្រុមអ៊ុយរុយហ្គាយនៅរាត្រីនេះ បើកឆាកពានរង្វាន់ FIFA World Cup 2022 ។
ក្រុមនៅអាស៊ី មានអរ៉ាប់ប៊ីសាអូឌីត និងជប៉ុន បានធ្វើឱ្យពិភពលោកភ្ញាក់ផ្អើលរួចទៅហើយ ក្រោយពីពួកគេយកឈ្នះក្រុមខ្លាំងៗដូចជាអាហ្សង់ទីន និងអាល្លឺម៉ង់កាលពីពេលកន្លងទៅនេះ។ ដូច្នេះនៅរាត្រីនេះដល់ភារកិច្ចរបស់កូរ៉េខាងត្បូងវិញម្ដង ដែលពួកគេនឹងចូលប្រកួតប៉ះជាមួយក្រុមអ៊ុយរុយហ្គាយដែលមកពីតំបន់អាមេរិកឡាទីន ដូចក្រុមអាហ្សង់ទីនដែរ។
លោក Paulo Bento គ្រូបង្វឹកក្រុមកូរ៉េខាងត្បូងបានអះអាងមុនការប្រកួតថា៖ “ខ្ញុំមិនឃើញមានហេតុផលដែលយើងនឹងត្រូវមានសម្ពាធលើស្មានោះទេ។ ប្រសិនបើនេះជាក្រុមដែលតែងតែត្រូវការឡើងជុំបន្ដ នោះខ្ញុំអាចនិយាយបានថាត្រូវ។ ខ្ញុំគិតថាយើងដឹងថាអ្វីដែលយើងត្រូវការ ហើយខ្ញុំគិតថាវាមិនមែនជាសម្ពាធលើកីឡាករនោះទេ។ យើងសង្ឃឹមថា យើងអាចឈានចូលទីលាននិងលេងបានដល់កម្រិតដែលយើងត្រូវការប៉ុណ្ណោះ”៕