កាំភ្លើងធំ Arsenal កំពុងតែរកឃើញទម្រង់លេងល្អរបស់ខ្លួនឡើងវិញ ដោយឈ្នះក្រុម Sporting ១-០ យប់មិញ បន្ដកំណត់ត្រាឈ្នះជាប់គ្នា១១ប្រកួតមកហើយ។
១គ្រាប់របស់ Danny Welbeck នៅនាទី៧៧ គឺជាគ្រាប់បាល់ជ័យជម្នះក្នុងការប្រកួតតែម្ដង។ ហើយវាក៏បានធ្វើឱ្យក្រុមរបស់លោក Unai Emery បន្ដកំណត់ត្រាឈ្នះជាប់គ្នារហូតដល់១១ប្រកួតមកហើយដែរ។ កំណត់ត្រាល្អនេះ ក្រុមកាំភ្លើងធំ ខកខានមាន យូរមកហើយ ពោលគឺចាប់តាំងពីឆ្នាំ២០០៧មក ពួកគេមិនដែលឈ្នះជាប់គ្នាបានច្រើនអីចឹងទេ។
បន្ថែមពីកំណត់ត្រានេះ Arsenal ក៏បានឡើងទៅឈរកំពូលតារាងក្នុងពូល E ផងដែរ។ ដោយពួកគេមាន៩ពិន្ទុពេញ តាមពីក្រោយដោយ Sporting មាន៦ពិន្ទុ។ នៅសល់ត្រឹម៣ប្រកួតទៀត ក្រុមកាំភ្លើងហាក់ដូចជាមានប្រៀបក្នុងការឡើងទៅវគ្គបន្ដបាត់ទៅហើយក្នុងពានរង្វាន់ Europa League នេះ៕ប្រភពDailyMail