ការជជែកដេញដោលគ្នារវាង Messi និង Ronaldo នៅតែបន្តជារៀងរាល់ថ្ងៃ ខណៈដែលអ្នកខ្លះជ្រើសរើសយកតារាឆ្នើមព័រទុយហ្គាល់ ហើយខ្លះទៀតរើសយកតារាឆ្នើមអាហ្សង់ទីនជាចំណូលចិត្តរបស់ខ្លួន។
កីឡាករទាំងពីរបានដណ្តើមយកកំណត់ត្រា និងពានរង្វាន់ជាច្រើនរាប់មិនអស់ពេញមួយអាជីពដ៏មិនគួរឱ្យជឿរបស់ពួកគេ។
ទោះបីជាយ៉ាងណាក៏ដោយ Gerrard បានគាំទ្រ Lionel Messi ជាង Cristiano Ronaldo នៅក្នុងការជជែកពិភាក្សានេះ។ អ្នកចាត់ការ Aston Villa បានបញ្ជាក់យ៉ាងច្បាស់ថា កំពូលតារាទាំងពីរគឺស្ថិតក្នុងស្ថានភាពខុសគ្នាពីកីឡាករដទៃទៀត។ ទោះជាយ៉ាងណាក៏ដោយ គាត់យល់ឃើញថា តារាឆ្នើម Paris Saint-Germain (PSG) គឺជាកីឡាករនាំក្រុមលេងបានល្អជាងតារាឆ្នើម Manchester United។
នេះជាអ្វីដែល Steven Gerrard បាននិយាយក្នុងពេលសម្ភាសន៍៖
“ពួកគេគឺជាកីឡាករពីរនាក់នៅស្ថិតក្នុងសម័យកាលរបស់ខ្ញុំ ដែលខុសតែឆ្នាំប៉ុណ្ណោះ។ នៅពេលដែលអ្នកជាកីឡាករបាល់ទាត់ ហើយអ្នកបានធ្វើវាបានដោយខ្លួនឯង – ខ្ញុំមិនប្រាកដថាមានកីឡាករណាផ្សេងទៀតនឹងអាចធ្វើវាបានម្តងទៀតនោះទេ។ ពួកគេ [Ronaldo និង Messi] ខុសគ្នាខ្លាំងសម្រាប់ខ្ញុំ”។
អតីតប្រធានក្រុម Liverpool រូបនេះបានបន្ថែមថា៖
“ខ្ញុំគិតថាពួកគេទាំងពីរកំពុងលេងតាមរបៀបពីរផ្សេងគ្នាដែលខុសប្លែកពីកីឡាករបាល់ទាត់គ្រប់រូបផ្សេងទៀតដែលកំពុងលេង។ ប្រហែលជាក្រៅពី Pele និង Maradona សម្រាប់ខ្ញុំ Messi គឺជាកីឡាករនាំក្រុមលេងបានល្អប្រសើរជាង។ ប្រសិនបើគាត់នៅមុខទី គាត់នឹងសម្លឹងមើលរកកីឡាករដទៃទៀតដើម្បីបញ្ជូនបាល់ ហើយគាត់ក៏មានចំនួនគ្រាប់បាល់ផ្ទាល់ខ្លូនល្អផងដែរ”៕
ប្រភព៖ Sportskeeda