រយៈពេលជិត ១ ម៉ោង កាលពីយប់ថ្ងៃទី ១២ មិថុនា ឆ្នាំ ២០២១ ពិភពបាល់ទាត់មានការតក់ស្លុតជាខ្លាំងក្រោយពេលខ្សែបម្រើ Christian Eriksen ដែលកំពុងប្រកួតសុខៗស្រាប់តែដួលសន្លប់ទៅលើទីលាននៅការប្រកួតរវាងដាណឺម៉ាកនិងហ្វាំងឡង់។
ភ្លាមៗនោះមិត្តរួមក្រុម និងក្រុមគ្រូពេទ្យបានប្រញាប់មកធ្វើការសង្គ្រោះបេះដូង CPR ដែលនាំឲ្យមានការតក់ស្លុតពេញកីឡដ្ឋាន លាយឡំទាំងទឹកភ្នែកពីមិត្តរួមក្រុមនិងអ្នកគាំទ្រ ក៏ដូចជាក្រុមគ្រួសាររបស់ Eriksen ផ្ទាល់។ ទឹកដោះម្ដាយថ្លៃ ព្រះនៅតែជួយ Eriksen ឲ្យមានជីវិតត្រលប់មកវិញ ប៉ុន្តែរឿងស្រដៀងនេះ បើរំឭកពីហេតុការណ៍លើកីឡាករបាល់ទាត់មួយចំនួនផ្សេងទៀត គឺពួកគេមិនសំណាងដូចជា Eriksen នោះទេ។
ខាងក្រោម CTS Sports ធ្វើការបង្ហាញឈ្មោះកីឡាករបាល់ទាត់ ៥ រូប ដែលបានបាត់បង់ជីវិត ក្រោយដួលសន្លប់នៅក្នុងការប្រកួត៖
៥) Marc Vivian Foe
https://www.youtube.com/watch?v=BDd8kDeMuPw
កំឡុងការប្រកួតឲ្យជម្រើសជាតិកាមេរ៉ូន ទល់ក្រុមកូឡុំប៊ី នៅខែមិថុនា ឆ្នាំ ២០០៣ ហេតុការណ៍រន្ធត់មួយនេះបានកើតឡើង។ នៅនាទី ៧២ លើទីលាន ក្នុងកីឡដ្ឋានប្រទេសបារាំង Vivivan Foe ដែលជាអតីតកីឡាករធ្លាប់លេងឲ្យ City កំពុងរត់លើទីលានសុខៗ ក៏ស្រាប់តែដួលសន្លប់ ហើយដកដង្ហើមសឹងតែលែងដល់គ្នា។
ក្រោយលើកមកដល់បន្ទប់សង្រ្គោះបន្ទាន់ក្នុងកីឡដ្ឋាន Vivian Foe ក៏បានទទួលមរណភាព ហើយតាមការធ្វើកោសល្យវិច័យសន្និដ្ឋានថា លោកកើតជំងឺបេះដូង ដែលវាជំងឺដំណពូជ និងមានហានិភ័យនៃការស្លាប់ភ្លាមៗកំឡុងពេលធ្វើលំហាត់ប្រាណ។
៤) Antonio Puerta
កាលពីជាង ១០ ឆ្នាំមុន ខ្សែការពារស្លាបសញ្ជាតិអេស្ប៉ាញ Puerta បានបាត់បង់ជីវិតនៅអាយុ ២២ ឆ្នាំ កំឡុងការប្រកួតរវាងក្រុម Sevilla និង Getafe។ នៅនាទី ៣៥ ក្នុងប្រអប់ទីរបស់ខ្លួន Puerta ដើរធម្មតាសុខៗ គេក៏អស់ជំហរហើយដួលទៅលើវាលស្មៅ។ យ៉ាងណាលោកបានទទួលមរណភាពក្រោយរយៈពេល ៣ ថ្ងៃ នៃការដឹកមកដល់មន្ទីរពេទ្យ ក៏ដោយសារជំងឺបេះដូងដូចគ្នា។
៣) Phil O’Donnell
ជាអតីតប្រធានក្រុម Motherwell ដែលបានបាត់បង់ជីវិតកំឡុងការប្រកួត ទល់ក្លឹប Dundee United កាលពីខែធ្នូ ឆ្នាំ ២០០៧។ ពេលនោះលោកមានអាយុ ៣៥ ឆ្នាំ ដោយក្រោយការតែតបញ្ចូលទីឲ្យក្រុម រួចរត់មកអបអរ ក៏ស្រាប់តែដួលឱនក្បាលចុះទៅក្រោម ហើយការទទួលមរណភាពរបស់លោកក៏ដោយសារតែជំងឺបេះដូងដូចគ្នា។
២) Cristiano Jr.
Cristiano Sebastiao de Lima Junior បានផ្ទេរមកលេងឲ្យក្លឹប Esat Bengal របស់ឥណ្ឌានៅឆ្នាំ ២០០៣ ហើយនៅឆ្នាំ ២០០៤ បានបន្តផ្ទេរទៅក្លឹប Dempo។ កំឡុងការតតាំងលើទីលាន ជាមួយអ្នកចាំទី ដែលលោកព្យាយាមស៊ុតបាល់បញ្ចូលទី ក៏នាំឲ្យលោកដួលសន្លប់ ហើយពេលនោះគ្មានក្រុមគ្រូពេទ្យឈរជើងនៅកីឡដ្ឋានដើម្បីសង្គ្រោះបឋមឡើយ ទើបនាំឲ្យបុរសវ័យ ២៥ ឆ្នាំ លាពិភពបាល់ទាត់ជារៀងរហូត។
១) Cheick Tiote
ជាកីឡាករសញ្ជាតិកូឌីវ័រ ដែលធ្លាប់បម្រើអាជីពឲ្យក្លឹបនៅអង់គ្លេស Newcastle United។ នៅឆ្នាំ ២០១៧ លោកក៏ធ្លាប់ទៅប្រលូកអាជីពជាមួយក្លឹបក្នុងប្រទេសចិន តែជាអកុសលលោកបានដួលសន្លប់កំឡុងការហ្វឹកហាត់មួយ ហើយត្រូវបានរថយន្តសង្គ្រោះបន្ទាន់ប្រញាប់ដឹកលោកយកទៅមន្ទីរពេទ្យ តែសោកស្ដាយជីវិតរបស់ Tiote គឺអស់ត្រឹមប៉ុណ្ណឹង៕
ជាចុងក្រោយយើងមានតែពាក្យថា សោកស្តាយនិងចូលរួមរំលែកទុក្ខសម្រាប់ការបាត់បង់នូវកីឡាករទាំង ៥ រូបខាងលើ ហើយសម្រាប់ Eriksen ក៏មានតែពាក្យជូនពរ ឲ្យលោកឆាប់ជាសះស្បើយ និងអាចវិលត្រលប់មកឈរជើងលើទីលានសារជាថ្មីនៅពេលឆាប់ៗខាងមុខ៕
បញ្ជាក់៖ អត្ថបទនេះមិនអាចចែករំលែកបង្ហាញនូវរូបភាព&ឯកសារមួយចំនួននោះទេ ព្រោះវាខុសនឹងគោលការណ៍ចែករំំលែកលើប្រព័ន្ធអ៊ីនធឺណិត តែរាល់ការបាត់បង់ជីវិតរបស់កីឡាករដូចរៀបរាប់ខាងលើ សុទ្ធតែជាព័ត៌មានពិត៕